اینترنتگه اولنیش و ترماق حالتینی کوزهتووچی «نتبلاکس» تشکیلاتینینگ معلوم قیلیشیچه، جانلی کۉرستکیچلر ایرانده اینترنتگه قسماً اولنیش قَیته تیکلنگنینی کۉرسهتماقده.
تشکیلات بوگون (سهشنبه،۵ جوزا) ایکس اجتماعی ترماغیده یازیشیچه، حاضرچه ایراندهگی اینترنت علاقهسی برقرار بۉلهدیمی یاکه یۉقمی بو انیق اېمس.
اینترنتگه قسماً اولنیش۷۷ کونلیک تۉلیق اوزیلیشدن سۉنگ و ایران جمهور رییسی مسعود پزشکياننینگ کۉرسهتمهسی اساسیده تیکلنگن.
پزشکيان تیناوون «ویرتول مکاننی ترتیبگه سالیش بۉییچه مخصوص شتب» قرارینی مملکت اخبارات وزیرلیگیگه یوبارگن. اوشبو قرارده اینترنت علاقهسینی اۉتگن هجري-شمسي ییل نینگ جدي آییدن اوّلگی حالتگه قَیتریش کۉزده توتیلگن.
ایران حکومتی مطبوعات سۉزلاوچیسی فاطمه مهاجرانی بوگونگی مطبوعات انجمنیده بو قرار عملگه آشیریلیشینی تصدیقلهگن.
ایران۱۴۰۴ هجري-شمسي ییل جدي آییده عامهوي خلق ناراضیلیکلری سبب اینترنتنی ایکّی هفتهدن آرتیق مدتگه اوزیب قۉیگن اېدی.
شونینگدېک، امریکا و ایراننینگ اۉشه ییل۹ حوت کونی باشلهگن هجوملریدن کېین هم ایران خلقارا اینترنتگه کیریشنی ینه تۉختهتگن و بو مملکت تاریخیدهگی اېنگ اوزاق اینترنت اوزیلیشلریدن بیری صفتیده قید اېتیلگن.
بو دورده فقط «آق رۉیخط»دهگی شخصلر، «پرا اینترنت» فایدهلنووچیلری یاکه سترلینک اینترنتیگه اېگه آدملر اینترنتدن فایدهلنه آلگن، قالگن ایران یشاوچیلری اېسه اینترنتگه کیره آلمهگن.
