ایران عاموی اخبارات واسطهلری بو مملکت مجلس باشلیغی محمد باقر قالیباف و تشقی ایشلر وزیری عباس عراقچی دوحهگه سفر قیلگنینی معلوم قیلدی.
فارس خبرگزارلیگینینگ یازیشیچه، «بو سفر سۉنگّی هفتهلرده پاکستان واسطهچیلیگیده باشلنگن و دوام اېتهیاتگن مجبوري اوروشنی توگهتیشگه قرهتیلگن دیپلوماتیک جریان نینگ دوامی حسابلنهدی.»
مذکور نشرنینگ قۉشیمچه قیلیشیچه، سفر دوامیده اوروشنی یکونلش بۉییچه مذاکرهلرنینگ اَیریم جهتلری یوزهسیدن قطرنینگ یوقاری مرتبهلی رسميلری بیلن مصلحتلشوولر اۉتکزیلهدی.
اوّلراق رویترز هم بو ایکّی یوقاری مرتبهلی ایران رسميسی قطر باش وزیری بیلن اوچرهشیش اوچون دوحهگه یۉل آلگنینی خبر قیلگن اېدی.
رویترز معلوماتیگه کۉره، مذاکرهلرنینگ اساسي موضوعلری هرمز همده ایران نینگ باییتیلگن یورانیوم ذخیرهلری بیلن باغلیق مسألهلر بۉلهدی.
اۉتگن هفته قطردن بیر هیئت هم تهرانگه سفر قیلیب، ایران رسميلری بیلن مذاکرهلر اۉتکزگن اېدی.
بو سفر امریکا رسميلری ایران بیلن کېلیشوو یکوني باسقیچگه یقینلشگنینی بیلدیرهیاتگن بیر پیتده عملگه آشماقده.
ایران تامانی هم پاکستان رسمي واسطهچی صفتیده قتنهشهیاتگن مذاکرهلرده، قطر و باشقه اَیریم دولتلر هم اَیریم کېلیشماوچیلیکلرنی حل قیلیش جریانینی یېنگیللشتیریشگه یاردم بېرهیاتگنینی تصدیقلهگن.
