ایران تشقی ایشلر وزیرلیگینینگ معلوم قیلیشیچه، پاکستان اوردوسی قوماندانی عاصم منیر بوگون (شنبه، ۲-جوزا) کېچقورون ایران تشقی ایشلر وزیری عباس عراقچی کوزهتوویده تهراننی ترک اېتگن.
پاکستان اوردوسی قوماندانی بیر کونلیک تهران سفری دوامیده ایران اسلام جمهوریتی جمهور رییسی مسعود پزشکیان، مجلس باشلیغی همده هیاتگه رییسلیک قیلگن محمد باقر قالیباف همده ایران رسميلری بیلن اوچرهشیب، مذاکرهلر اۉتکزگن.
ایران دولت تلویزیونینینگ خبریگه کۉره، پاکستان اردو کوچلری قوماندانی عاصم منیر ایران جمهور رییسی مسعود پزشکان بیلن اوچرهشووده ایران و امریکا اۉرتهسیدهگی مذاکرهلر جریانینی محاکمه قیلیب، «بختیمیزگه مذاکرهلر یخشی کېتماقده»، دېگن.
مذکور خبرگه کۉره، پزشکان اولر فقط ایران خلقینینگ قانوني حقوقلرینی حمایه قیلیشنی کۉزلهیاتگنینی، بیراق امریکالیکلر بیلن مذاکره تجربهسی نهایتده احتیاطکار بۉلیشنی طلب قیلیشینی ایتگن.
ایران جمهور رییسی مسعود پزشکیان امریکا بو ماجرا آرقهلی غلبه قازانه آلمهسلیگینی، اساسي ضرر اېسه منطقه و دنیا دولتلریگه یېتیشینی تأکیدلهگن.
ایران پارلمانی رئیسی و مذاکرهچی هیئت رهبری محمد باقیر قالیباف هم عاصم منیر بیلن اوچرهشووده، اولر امریکا بیلن مذاکره آلیب بارهیاتگن پیتده واشنگتن اوروش باشلهگنینی و اېندی اېسه اونی توگهتیش اوچون ینه مذاکره طلب قیلهیاتگنینی ایتگن.
قالیبافنینگ قۉشیمچه قیلیشیچه، پاکستان واسطهچیلیگیده تامانلر اۉت آچیشنی تۉختهتیش رېجیمیگه هم کېلیشگن اېدی، بیراق امریکا کېلیشوونی بوزیب، ایراننینگ دېنگیز قملینی باشلهگن و حاضر اونی بېکار قیلیشگه اورینماقده.
ایران پارلمانی رئیسینینگ آگاهلنتیریشیچه، مملکت قوراللی کوچلری صلح دوریده اۉزینی قَیته تیکلهگن و اوروش ینه باشلنسه، «امریکا اوچون اوروش نینگ بیرینچی کونیدهگیدن هم قتّيقراق و اچّیقراق ضربه بۉلهدی».
عاصم منیر کېچه سۉنگگی قریب۴۰ کون ایچیده ایکّینچی مرته تهرانگه باریب، اران رسميلری بیلن مذاکرهلر اۉتکزدی. حاضرچه اوشبو اوچرهشوولرنینگ انیق نتیجهلری و تفصیلاتلری اعلان قیلینمهگن.
عاصم منر شهباز شریف بیلن بیرگهلیکده ایران و امریکا اۉرتهسیدهگی مذاکرهلرگه رسمي واسطهچیلیک قیلماقده. سۉنگّی کونلرده تامانلر اۉرتهسیده ینگی مذاکره باسقیچینی تشکیل اېتیش و اوروشنی توگهتیشگه قرهتیلگن کېلیشووگه اېریشیش حرکتلری کوچهیگن.
