ایران خبرگزارلیگینینگ خبریگه کۉره، ایران اوروشنی توگهتیش بۉییچه امریکا قۉشمه ایالتلرینینگ سۉنگّی پیشنهادیگه جوابینی بوگون (یکشنبه،۲۰-ثور) مذاکرهلردهگی واسطهچی پاکستانگه تاپشیرگن.
خبرگزارلیکنینگ یازیشیچه، «تکلیف اېتیلگن رېجه اساسیده مذاکرهلر بو باسقیچده منطقهدهگی اوروشنی توگهتیش مسألهسیگه قرهتیلهدی.»
بوندن آلدین ایران تشقی ایشلر وزیرلیگی سۉزلاوچیسی اسماعیل بقایی «امریکا پیشنهادلری بۉییچه ایراننینگ قرهشلری و ملاحظهلری یکوني کۉریب چیقیش همده عمومیلشتیریشدن کېین یوباریلهدی»، دېگن اېدی.
امریکا تخمیناً بیر هفته آلدین اوروشنی یکونلش و هرمزنی قَیته آچیش بۉییچه ینگی پیشنهادنی ایرانگه تقدیم اېتگن اېدی.
امریکا عامهوی اخبارات واسطهلری امریکا ایران تامانیگه اوروشنی توگهتیش اوچون ۱۴بنددن عبارت بیر صحیفهلیک رېجه تکلیف قیلگنینی خبر قیلگن اېدی.
شوندن بویان دونالد ترامپ بیر نېچه بار ایراننینگ جوابینی کوتهیاتگنینی ایتگن.
ایران و امریکا صلح کېلیشووی همده اسلام آباددهگی ایلک تۉغریدن-تۉغری مذاکرهلر دوامیده اوروشنی توگهتیشگه عاید بیر نېچه رېجهلرنی اۉز ارا المشگن، بیراق حاضرگچه مذاکرهلرنی قَیته باشلش و تینچلیک بیتیمینی امضالش بۉییچه کېلیشووگه اېریشه آلمهگن.
