ایران دولت یېتکرمهلری پنجشنبه آقشامیده (۲۱-حوت) مجتبی خامنهاینینگ مملکت نینگ ینگی رهبری صفتیدهگی ایلک پیامینی نشر قیلدی.
او؛ اوشبو بیاناتیده امریکا قۉشمه ایالتلری و اسرایل هجوملریده هلاک بۉلگنلر، جملهدن هرمزگاندهگی «شجره طیبه» قیزلر مکتبی اۉقووچیلرینینگ قانی اوچون قصاص آلیش، خلیج فارسده هرمزنی تنگهسینی یاپیش و منطقهدهگی امریکا حربی مرکزلریگه هجوملرنی دوام اېتتیریش ضرورلیگینی تأکیدلهگن.
او پیامینینگ بیر قِسمیده شوندهی دېگن: «برچهگه شونی ایشانچ بیلن ایتهمن: بیز شهیدلرنینگ قانی اوچون قصاص آلیشدن واز کېچمهیمیز. بیز کۉزلهگن قصاص فقط انقلاب نینگ اولوغ رهبری علی خامنهاینینگ شهید بۉلیشی بیلن باغلیق اېمس. دشمن تامانیدن شهید قیلینگن خلقیمیزنینگ هر بیر اعضاسی هم قصاص آلیش اوچون علیحده سبب دیر»
ینگی رهبر مملکت حربيلریگه مراجعت قیلیب، خلقنینگ طلبی «تأثیرلی و پُشیمان قیلووچی حمایهنی دوام اېتتیریش» اېکنینی ایتگن همده «البته هرمزنی یاپیش واسطهسیدن فایدهلنیش کېرهک» دېب قۉشیمچه قیلگن.
اونینگ قۉشیمچه قیلیشیچه، «دشمن تجربهسی جوده کم بۉلگن و او یېرده جوده ضعیف بۉلهدیگن باشقه جبههلرنی آچیش مسألهسی هم اۉرگنیلگن. اگر اوروش دوام اېتسه و ضرورت بۉلسه، اولرنی فعاللشتیریش ممکن»
مجتبی خامنهای، ایران 15 ته دولت بیلن قوروقلیک و دېنگیز آرقهلی قۉشنی بۉلیب، هر دایم اولر بیلن ایلیق و کانتروکتیف علاقهلرنی ایستهگن. بیراق، اونینگ سۉزلریگه کۉره، «دشمن ییللر دوامیده بو دولتلرنینگ اَیریملریده حربي و مالیوي مرکزلر قوریب، منطقه اوستیدن نظارتنی مستحکملشگه حرکت قیلگن»
«سۉنگگی هجومده انه شو حربي مرکزلرنینگ اَیریملری ایشلهتیلگن. بیز اېسه اوّل آگاهلنتیرگنیمیزدېک، اۉشه مملکتلرنینگ اۉزیگه اېمس، فقط اۉشه بازهلرگه ضربه بېردیک. اگر ضرورت بۉلسه، بونی ینه دوام اېتتیرهمیز. شونگه قرهمهی، قۉشنیلریمیز بیلن دۉستلیکنی ضرور دېب بیلهمیز»
ینگی رهبر قۉشنی دولتلر «اېران خلقیگه قرشی تجاوز قیلهیاتگنلر بیلن مناسبتینی انیق بېلگیلشی کېرهک» لیگینی هم ایتگن.
او شونینگدېک شوندهی توصیه قیلگن :«اولر بو مرکزلرنی امکان قدَر تېزراق یاپیشلری کېرهک، چونکه امریکانینگ خوفسیزلیک و تینچلیکنی تأمینلش حقیدهگی دعوالری یالغان اېکنینی الّهقچان توشونیب یېتگن بۉلیشلری کېرهک.»
پیامده مجتبی خامنهای ایران خلقیدن هم مملکت تیزیمینی قۉللب-قوّتلشنی دوام اېتتیریشنی، قدس مناسبتی بیلن کۉچهلرگه چیقیشنی سۉرهگن. شونینگدېک، او رسميلرگه اوروشدن ضرر کۉرگنلرگه یاردم بېریش و اَیریم خدمتلرنی بېپول تقدیم اېتیش بۉییچه کۉرسهتمه بېرگن.
مجتبی خامنهای شو هفتهنینگ یکشنبه کونی ایران خبرگان مجلسی تامانیدن بو مملکتنینگ ینگی رهبری اېتیب سیلنگن و دوشنبه تانگیده رسماً اعلان قیلینگن.
او آتهسی علی خامنهاینینگ اۉرنینی اېگهلهدی. سابق رهبر امریکا و اسرایلنینگ اېران حدودیگه قیلگن دستلبکی هجوملریده هلاک بۉلگن.
