امریکا و اسرایلنینگ ایران بیلن اوروشی ایکّینچی هفتهسیگه کیرر اېکن، امریکا مرکزي قوماندانلیگی سنتکام سۉنگگی هفته ایچیده اېران ایچیده۳ مینگدن آرتیق هدفگه هجوم قیلینگنینی معلوم قیلدی.
سنتکام بوگون (شنبه، ۱۶حوت) نشر قیلگن پُستیده، اوشبو مملکت ایرانگه قرشی هجوم تېزلیگینی کمهیتیرمسلیگینی بیلدیرگن.
تیناوون کېچقورون امریکا و اسرایلنینگ ایرانگه هجوملری دوام اېتگن، ایران نینگ مطبوعاتی اېسه غربي تهران، اکباتان شهرچهسی و مهرآباد قۉنالغهسیگه هجوملر بۉلگنینی خبر قیلگن.
ایران هم اسرایل شهرلریگه و منطقهدهگی امریکا حربی مرکزلریگه قرشی هجوملرنی دوام اېتتیرماقده.
ایران اسلام انقلابي قۉریقچیلری سپاهپاسداران تل آویو شهرینی راکت هجوملرینینگ مقصدی قیلگنینی دعوا قیلگن.
خلقارا مطبوعات هم سعوديه عربستانی، بحرین و بیرلشگن عرب امیرلیگینینگ دبی شهریگه قرشی راکت هجوملری حقیده خبر بېردی.
امریکا و اسرایلنینگ ایرانگه هجومی اۉتگن هفته شنبه کونی ساعت۱۰:۰۰اطرافیده باشلنگن. دستلبکی تۉلقین هجوملرده اېران رهبری علی خامنهای و بیر قطار یوقاری مرتبهلی عملدارلر هلاک بۉلگن.
ایران اېسه جوابن اسرایل شهرلریگه و منطقهدهگی امریکا حربی قرارگاهلریگه هجوملرنی باشلهگن.
خبرلرگه کۉره، ایران حاضرگه قدَر منطقهدهگی ۱۰ دن آرتیق مملکتدهگی هدفگه هجوم قیلگن. امریکا و اسرایلنینگ ایرانگه قرشی هجوملرینینگ کوچهییشی و ایران نینگ منطقه مملکتلریگه هجوملری یقین شرقده اوروشنینگ کېنگهییشی خواطرینی آشیرماقده.
