انسان حقلری تشکیلاتی ههنگاونینگ خبر بېریشیچه، امریکا و اسرایلنینگ ایرانگه قیلگن هجوملری عاقبتیده حاضرگچه کمیده بیر مینگ ۵۰۰ کیشی هلاک بۉلگن.
اوشبو تشکیلات بوگون (دوشنبه، 11 حوت) اعلان قیلگن گزارشیده اۉلدیریلگنلر آرهسیده بیرمینگ ۳۰۰نفر حربي و۲۰۰نفر تینچ اهالی وکیلی بارلیگینی معلوم قیلگن.
ههنگاونینگیازیشیچه، حاضرگچه ایراننینگ۲۲ ولایتیدهگی۱۵۰ شهرده حربي و حکومت مرکزلری هوا همده راکت ضربهلریگه اوچرهگن.
تشکیلاتگه کۉره، نشانگه آلینگن مقصدلر«سپاهپاسداران پایگاهلری، بسیج مرکزلری، حربی قۉنالغهلر، موشکی سایتلر، کلانترلر، قضایی ادارهلر، اطلاعات ادارهسی خبری ستادلری، ارتش پادگانلری یگان ویژه مقرلری بۉلگن.»
ههنگاو معلوماتیگه کۉره، حربيلر آرهسیدهگی اېنگ کتّه تلفاتلر تهران، کیرمانشاه، غربي آذربایجان، شرقي آذربایجان و کردستان ولایتلریده قید اېتیلگن.
تشکیلاتنینگ قۉشیمچه قیلیشیچه، تینچ اهالی آرهسیدهگی اېنگ کۉپ قربانلر هرمزگان ولایتیده کوزهتیلگن.
ههنگاونینگ بیلدیریشیچه، موجود حجتلرگه کۉره، هرمزگاندهگی هلاک بۉلگنلرنینگ کتّه قِسمی «شجره طیبه» ناملی باشلنغیچ مکتبنینگ قیز اۉقووچیلری بۉلگن.
ایران حکومتی اوشبو مکتبگه قیلینگن هجوم نتیجهسیده ۱۶۸ کیشی هلاک بۉلگنینی و ینه۹۵کیشی جراحت آلگنینی اعلان قیلگن.
تشکیلات معلوماتیگه کۉره، هرمزگاندن تشقری تهران، خراسان رضوی، قزوین، البرز، کیرمانشاه، کردستان، غربي آذربایجان و شرقي آذربایجان ولایتلریده هم تینچ اهالی، جملهدن بیر نېچته بالهلرنینگ هلاک بۉلگنی قید اېتیلگن.
ههنگاو شونینگدېک، خوفسیزلیک و حربي ادارهلرگه یقین جایلشگن اداری همده تورر-جای بنالری هم هوا هجوملری عاقبتیده جدّي ضرر کۉرگنینی و خدمت کۉرسهتیشده اوزیلیشلر یوزهگه کېلگنینی بیلدیرگن.
ایران قیزیل آی جمعیتی تیناوون معلوم قیلیشیچه، امریکا و اسرایلنینگ هجوملری عاقبتیده حاضرگچه۵۵۵ کیشی هلاک بۉلگن.
امریکا و اسرایل شنبه کونی اېرتهلب ایرانگه قرشی کېنگ کۉلملی حربي هجوملرنی باشلهگن و اوروش حلی هم دوام اېتماقده.
اوشبو هجوملر عاقبتیده حاضرگچه ایران رهبری علی خامنهای عایلهسینینگ اَیریم اعضالری همده بیر قطار یوقاری مرتبهلی حربي عملدارلر، جملهدن مدافعه وزیری و سپاهپاسداران قوماندانی اۉلدیریلگنی خبر قیلینگن.
