ایران و امریکا اۉرتهسیدهگی هسته مذاکرهلرینینگ ایکّینچی باسقیچی بیلن بیر پیتده، ایراننینگ عالي رهبری علی خامنهای امریکا جمهور رییسی دونالد ترامپنینگ تهدیدلریگه جوابن شوندهی دېدی.
«دنیادهگی اېنگ کوچلی اوردو هم بعضاً شوندهی ضربه یېییشی ممکنکی، اۉرنیدن توره آلمهی قالهدی.»
ایران رهبری بوگون (سهشنبه، ۲۸ دلو) شوندهی دېدی: «دایم ایتیشهدی: بیز ایران تامانگه حربي کېمه یوباردیک. خۉپ، کېمه البته خوفلی قوریلمه، اما کېمهدن هم خوفلیراق نرسه بار؛ او کېمهنی دېنگیز توبیگه چۉکتیره آلهدیگن قورال.»
خامنهای دونالد ترامپ یقینده امریکا۴۷ ییلدن بېری «اسلام جمهوریتنی یۉق قیله آلمهگنینی» ایتگنینی اېسلهتیب، قۉشیمچه قیلدی.
«مېن ایتهمن: سېن هم بونی قیله آلمهیسن.»
ایران رهبری ایران و امریکا اۉرتهسیدهگی حاضرگی هسته مذاکرهلریگه هم تۉختهلیب، مذاکره باشلنمسدن توریب اونینگ نتیجهسینی بېلگیلشنی «احماقانه ایش» دېب بهالهدی.
او شوندهی دېدی» کېلینگ، سیزنینگ هسته انرژینگیز حقیده مذاکره قیلهیلیک و مذاکرهنینگ نتیجهسی شوندهی بۉلسینکی، سیزده بو انرژی بۉلمهسین. اگر مذاکره بۉلهدیگن بۉلسه، اونینگ نتیجهسینی آلدیندن بېلگیلش ناتۉغری و احماقانه ایش»
بو آرهده، ایران و امریکا اۉرتهسیدهگی هسته مذاکرهلری ایکّینچی بار بوگون جنیوا شهریده عمان نینگ واسطهچیلیگیده دوام اېتماقده.
امریکا جمهور رییسی دونالد ترامپ بیر نېچه بار امریکا ایرانگه هسته قورالیگه اېگه بۉلیشگه رخصت بېرمسلیگینی ایتگن و اگر بو بارهده کېلیشووگه اېریشیلمسه، ایران جوده قتّيق ضربهگه دوچ کېلیشینی تأکیدلهگن. شونینگدېک، امریکا ایران بیلن کېسکینلیک کوچهیگنی سبب منطقهدهگی حربي اشتراکینی آشیریب، یقین شرققه ایکّی ته حربي کېمهنی یوبارگن.
