رویترز اخبارات آژانسی ایرانلیک بیر بلند مرتبهلی رسمیگه تهیهنیب خبر بېریشیچه، ایرانده بۉلیب اۉتهیاتگن ناراضیلیک نمایشلری دوامیده قریب ایکّی مینگ کیشی، جملهدن خوفسیزلیک کوچلری اۉلدیریلگن.
اسمی آشکار اېتیلیشینی ایستهمهگن اوشبو ایرانلیک یوقاری مرتبهلی رسمی بوگون (سهشنبه، ۲۳ جدی) رویترزگه بېرگن بیاناتیده «ترورچیلر» اوشبو مملکتدهگی نمایشچیلر و خوفسیزلیک کوچلرینی اۉلدیرگنینی ایتگن.
رویترزنینگ یازیشیچه، مذکور منبع هلاک بۉلگنلر حقیده قۉشیمچه تفصیلاتلرنی کېلتیرمهگن.
بوندن آلدین ایراننینگ دولتگه قرهشلی یېتکرمهلری هم مملکتدهگی ناراضیلیکلر چاغیده قربانلر سانی «سېزیلرلی» اېکنینی خبر قیلگن، بیراق انیق رقملرنی تقدیم اېتمهگن اېدی.
ایران رسميلری حاضرگچه مملکتنینگ تورلی شهرلریده بۉلیب اۉتگن ناراضیلیکلر عاقبتیدهگی تلفاتلر بۉییچه رسماً معلومات بېرمهگن.
اولر «ترورچیلر» امریکا و اسراییل کۉمهگیده خلق ناراضیلیکلرینی «ترورچیلیک عملیاتلری»گه ایلنتیرگنینی همده هم پولیس خادملری، هم عادي اهالینی اۉلدیرگنینی ادعا قیلماقده.
رویترزنینگ یازیشیچه، آژانس نمایشچیلر بیلن ایران خوفسیزلیک کوچلری اۉرتهسیده کېچهسی یوز بېرگن زۉرآور تۉقنهشوولر، شونینگدېک اتوموبیللر و بنالرنینگ یاقیب یوباریلگنی عکس اېتگن بیر نېچته ویدیونی تصدیقلهگن.
رویترز حساباتیگه کۉره، امریکاده جایلشگن «هرانا» انسان حقوقلری گروهی هلاک بۉلگنلر سانی ایکّی مینگ کیشیدن آشگنینی بیلدیرگن.
هرانانینگ معلوماتیگه کۉره، دوشنبه کونی آخریگچه ایران دولت کوچلری تامانیدن۱۰ مینگ۷۲۱ نفر کیشی حبسگه آلینگن.
ایرانده ناراضیلیک نمایشلری۱۶ کون آلدین باشلنگن بۉلیب، سۉنگگی کونلرده حکومتگه قرشی حرکتگه ایلنگن و زۉرآور توس آلگن.
ناراضیلیکلرنینگ کېنگهییشی و زۉرآورلشووی آرتیدن ایران حکومتی پنجشنبه کونی کېچقوروندن بویان مملکت بۉیلب اینترنتنی اۉچیریب قۉیگن.
تورلی غرب دولتلری ایران اینترنتنی اۉچیریش آرقهلی نمایشچیلرنی کېنگ کۉلمده باستیریشگه اورهیاتگنینی اَیتماقده.
مذکور ناراضیلیکلر یانیده ایران حکومتیگه خلق ارا باسیملر کوچهیگن و امریکا جمهور رییسی دونالد ترامپ بو مملکتنی حربي هجوم بیلن تهدید قیلگن.
