ایراننینگ دولتگه قرهشلی یېتکرمهلری مملکت حکومتینی قۉللش مقصدیده بیر قطار شهرلرده یوریشلر اۉتکزیلگنی حقیده خبر بېرماقده.
صدا و سیما خبریگه کۉره، یوریشلر تهران، مشهد، قوم، زاهدان، رشت، ایلام، اهواز، آبادان، یسوج و ایراننینگ ینه بیر قنچه شهرلریده بۉلیب اۉتگن.
مذکور یوریشلر ایراننینگ «اسلامی ترغیبات کېنگشی» چقیریغی بیلن تشکیل اېتیلگن.
ایران جمهور رییسی مسعود پزشکیان تیناوون اهالینی اوشبو یوریشلرده اشتراک اېتیشگه چقیرگن اېدی.
دولت یېتکرمهلرینینگ یازیشیچه، یوریش اشتراکچیلری «سۉنگّی کونلرده فتنهچیلر و ترورچیلر تامانیدن خلق همده خوفسیزلیکنی تأمینلاوچیلرگه قرشی عملگه آشیریلگن حرکتلر»نی قارهلهگن.
بو یوریشلر ایران بۉیلب عامهوي ناراضیلیکلر باشلنگنیگه۱۶ کون تۉلگن بیر پیتده اۉتکزیلدی. اعتراضلر دستلب تهرانده ارز نرخی نینگ آشیشیگه قرشی باشلنگن، بیراق تېز آرهده کېنگهییب، حکومتگه قرشی حرکتگه ایلنگن.
ایراننینگ دولت یېتکرمهلری سۉنگّی کونلردهگی اعتراضلر چاغیده جماعت ملکیگه ضرر یېتکزیلگنی، یاقیب یوباریش حالتلری، شونینگدېک، پولیس خادملری و تینچ اهالی نینگ اۉلدیریلگنی حقیده خبر بېرگن.
ایران تشقی ایشلر وزیری عباس عراقچی بوگون بیانات بېریب، سۉنگّی کونلرده «ترورچیلر» نمایشچیلر صفگه قۉشیلگنینی و معلوم بیر باسقیچدن کېین نمایشلر «ترورچیلیک عملیاتلر»گه ایلنگنینی ایتدی.
شو بیلن بیرگه، خلق ارا انسان حقوقلری تشکیلاتلری ایران خوفسیزلیک کوچلری تامانیدن نمایشچیلرگه نسبتاً کېنگ کۉلملی زۉروانلیک قۉللنیلهیاتگنیدن خواطر بیلدیرماقده.
مملکت تشقریسیده فعالیت یوریتووچی «ایران انسان حقوقلری تشکیلاتی» معلوماتیگه کۉره، کمیده۱۹۲ نفر نمایشچی دولت کوچلری تامانیدن اۉلدیریلگن.
ناراضیلیکلر کېنگهییشی آرتیدن ایران حکومتی پنجشنبه آقشامیدن بویان بوتون مملکت بۉیلب اینترنتنی اۉچیریب قۉیگن. بو اېسه اخباراتگه اېریشیشنی جدّي درجهده چېکلهگن.
