ایرانده خلق ناراضیلیکلری دوام اېتر اېکن، تسنیم اخبارات آژانسی مملکت خوفسیزلیک منبعلریگه تهیهنیب، «ترتیبسیزلیکلر یېتکچیلری و گروه باشلیقلری»دن۲۰۰ نفر شخص حبسگه آلینگنی حقیده خبر بېردی.
مذکور یېتکرمه حبسگه آلینگن شخصلرنی «ترورچیلر» دېب اتهب، اولرنینگ «اۉقاتر قوراللر و جنگاور نارنجکلر» بیلن بیرگه قۉلگه آلینگنینی معلوم قیلگن.
ایران سپاه پاسدران گه یقین بۉلگن اوشبو یېتکرمه خبریگه کۉره، حبسگه آلینگنلر ایراندهگی «دولت، حربي و خوفسیزلیککه عاید مهم مرکزلر»گه هجوملرنی تشکیل اېتگن همده خوفسیزلیک کوچلری و حتا «عادي آدملر» تامانگه هم اۉق اوزگن.
اوشبو یېتکرمهنینگ ادعا قیلیشیچه، مذکور حبسگه آلیشلر کېچه ناراضیلیکلر شدّتی نینگ پسهییشیگه سبب بۉلگن.
سۉنگّی کونلرده ایران دولت عاموی اخبارات واسطهلری ناراضیلیکلر وقتیده بیر قطار خوفسیزلیک خادملری و عادي آدملر هلاک بۉلگنی حقیده خبر بېرگن، بیراق انیق رقملرنی کېلتیرمهگن.
بو آرهده، مملکت تشقریسیده فعالیت یوریتووچی ایران انسان حقوقلری تشکیلاتی حکومت کوچلری تامانیدن اعتراضچیلرنی باستیریش چاغیده۵۰ نفردن آرتیق نمایشچی اۉلدیریلگنینی بیلدیرگن.
مذکور تشکیلات شونینگدېک، ایران خوفسیزلیک کوچلری ایکّی مینگدن آرتیق نمایشچینی حبسگه آلگنینی معلوم قیلگن.
معلوماتلرگه کۉره، ایراندهگی ناراضیلیکلر بوگون اۉن تۉرتینچی کونیگه کیردی. ناراضیلیکلر دستلب تهراندهگی سوداگرلرنینگ ارز نرخی آشیشیگه قرشی ناراضیلیگیدن باشلنگن و تېز آرهده کېنگهییب، حکومتگه قرشی حرکتگه ایلنگن.
امریکا تشقی ایشلر وزیری مارکو روبیو بوگون ایکس اجتماعي ترماغیده یازگن پُستیده امریکا قۉشمه ایالتلری «ایران نینگ جسور خلقینی» قۉللب-قوّتلشینی بیلدیرگن.
امریکا جمهور رییسی دونالد ترامپ هم ایراننی آگاهلنتیریب، اگر نمایشچیلر قیرغین قیلینسه، امریکا تامانیدن قتّيق ضربه بېریلیشینی ایتگن.
اېران عالي رهبری علی خامنهای اېسه نمایشچیلرنی «ترتیبسیزلیک» و «ویرانکارلر» دېب اتهب، اولرگه نسبتاً یان بېریلمسلیگینی تأکیدلهگن.
