ایراننینگ رهبری علی خامنهای مملکتده یوز بېرگن سۉنگّی ناراضیلیک نمایشلریدن کېیین خارجي پوللرنینگ ایران ملی پولی برابریده آشیشینی «طبيعي اېمس و دشمن ایشی» دېب بهالهدی.
تسنیم خبریگه کۉره، او بوگون اېرتهلب (شنبه، ۱۳ جدی) تهرانده قیلگن چیقیشیده ایران رسميلری خارجي پوللر آشگنینینگ معما اېکنینی تن آلهیاتگنینی و بو معمانی حل قیلیشگه حرکت قیلهیاتگنینی ایتگن.
خامنهای سۉنگّی بیر هفته ایچیدهگی ناراضیلیکلرگه اشاره قیلیب، سوداگرلر و دوکان اېگهلری خارجی پول نرخی آشگنی حقیده ناراضی بۉلهیاتگنینی، اولر نینگ ناراضیلیگی حق اېکنینی بیلدیرگن. بیراق او «اَیریملر قۉزغهتیلگن و یاللنگن»، اولرنینگ آرتیده دشمن تورگنینی، همده «اسلامگه، ایرانگه و اسلام جمهوریتی توزومیگه قرشی شعارلر» ینگرهیاتگنینی تأکیدلهگن.
اونینگ قۉشیمچه قیلیشیچه، مسووللر ناراضیلر بیلن گپلشیشی کېرهک، اما «ترتیبسیزلیک چیقرووچیلر» بیلن گپلشیش فایدهسیز و اولر «اۉز اۉرنیگه قۉییلیشی» لازم.
ایراندهگی جاري ناراضیلیک نمایشلری اۉتگن هفته یکشنبه کونی تهراندهگی اَیریم دوکان اېگهلرینینگ دالر نرخی نینگ ريالگه نسبتاً آشیشیگه قرشی ناراضیلیگیدن باشلنگن و قیسقه فرصتده مملکت نینگ باشقه شهرلریگه هم ترقهلگن.
ترقهلگن صورت و ویدیولرده اَیریم شهرلرده نمایشچیلر ایران حکومتیگه قرشی شعارلر ایتهیاتگنی کۉرینهدی.
اَیریم یېتکرمهلرگه خبر بېریشیچه، اوشبو ناراضیلیکلر دوامیده کمیده سکّیز نفر نمایشچی هلاک بۉلگن، اۉنلب کیشی اېسه حبسگه آلینگن.
