ایران نینگ خاتم الانبیا مرکزي قرارگاهی امریکانینگ اوروشنی یکونلش بۉییچه کېلیشوو شرطلریگه عمل قیلمهگنینی و اسرایل نینگ جَنوبي لبناندهگی هجوملری دوام اېتهیاتگنینی سبب قیلیب، هرمز بۉغازی کېمهلر قتناوی اوچون یاپیلیشینی اعلان قیلدی.
ایران نینگ فارس اخبارات آژانسی خبریگه کۉره، قرارگاه بوگون (شنبه،۳۰ جوزا) ترقهتگن بیاناتیده بو قرارنی امریکا نینگ کېلیشوودهگی مجبوريتلرینی بجرمهگنی همده اسرایل کوچلری نینگ جَنوبي لبناندن چیقمهگنی بیلن ایضاحلهگن. بیاناتده بو «دشمن وعدهبوزرلیگیگه جواب نینگ بیرینچی قدمی» اېکنی، اگر هجوملر دوام اېتسه، قۉشیمچه چارهلر هم کۉریلیشی ایتیلگن.
معلوماتلرگه کۉره، ایران و امریکا اۉرتهسیدهگی کېلیشوونینگ بیرینچی بندیده تامانلر و اولرنینگ اتفاقچیلری برچه جبههلرده، جملهدن لبنانده هم حربي عملیاتلرنی تۉختهتیشی همده بیر-بیریگه قرشی کوچ ایشلهتمسلیک مجبوريتینی آلگن اېدی.
بیراق کېلیشوو امضالنگنیدن کېین هم اسرایل نینگ جَنوبي لبناندهگی هجوملری و حزبالله نینگ اسرایل حدودلریگه ضربهلری دوام اېتهیاتگنی حقیده خبرلر کېلماقده.
شونینگدېک، کېچه امریکا، ایران و قطر واسطهچیلیگیده ینگی صلح بۉییچه کېلیشووگه اېریشیلگنی حقیده معلوماتلر ترقهلگن اېدی. اما بوگون تانگده اسرایل جَنوبي لبناندهگی بیر قطار حدودلرگه ینه ضربهلر بېرگنی و بونینگ عاقبتیده کمیده۱۶ کیشی هلاک بۉلگنی خبر قیلینماقده.
عینِ پیتده امریکا رسميلری هرمز بۉغازی عملده یاپیلگنینی تصدیقلهمهگن و دېنگیز قتناوی دوام اېتهیاتگنینی بیلدیرگن.
