ایران اوردوسی و سپاهپاسداران امریکانینگ هجوملریگه جوابن بحرین، اردن و کویتدهگی امریکا قۉشمه ایالتلری حربي بزهلریگه ضربه بېرگنینی اعلان قیلدی.
اېران دولت تلویزیونینینگ خبریگه کۉره، ایران اوردوسی «درونلر هجوملرینینگ بیر نېچه تۉلقینی آرقهلی بحریندهگی امریکا بزهلری و امریکا بېشینچی دېنگیز فلوتی رادار تیزیملرینی نشانگه آلگنینی» بیلدیرگن.
مذکور خبرگه کۉره، ایران سپاه پاسداران هوا فضاسی نینگ اېراکاسمیک کوچلری قتّيق یاقیلغیلی راکتلر یاردمیده «تۉرتته مهم نشان، جملهدن اردندهگی الازرق هوا بزهسیده جایلشگن ف-35 قیرووچی اوچاقلری انگرلری همده امریکا اوردوسی نینگ قوماندانلیک و باشقروو مرکزی»گه ضربه بېریب، اولرنی یۉق قیلگنینی معلوم قیلگن.
شونینگدېک، اېران دولت تلویزیونی سپاه پاسداران کویت نینگ الجهرا حدودیدهگی امریکا بزهسینی هم نشانگه آلگنینی یازگن.
امریکا کېچه تونده اپاچې حربي تیک اوچری قولهتیلگنیدن سۉنگ ایراندهگی نشانلرگه هجوم اویوشتیرگن اېدی. واشنگتن اوشبو حادثه اوچون ایراننی مسوول دېب بیلگن.
امریکا اردو کوچلری مرکزی قوماندانلیگی (سنتکام) نینگ بیاناتیگه کۉره، «امریکا مرکزي قوماندانلیگی کوچلری امریکا هوا و دېنگیز کوچلری قیرووچی اوچاقلری تامانیدن قۉللنیلگن یوقاری انیقلیکدهگی قوراللر یاردمیده اېران نینگ هرمز بۉغازی یقینیدهگی هوا مدافعهسی تیزیملری، یېروستی باشقروو ستشنلری و کوزهتوو رادار اۉبژېکتلریگه ضربه بېرگن.»
سنتکام اوشبو عملیات «امریکا کوچلری و منطقوي سوولردن اۉتهیاتگن خلقارا تجارت کېمهلریگه قیلینگن سۉنگگی هجوملرگه متناسب جواب» بۉلگنینی تأکیدلهگن.
بیانات یکونیده امریکا اوردوسی «ایران نینگ اساسسیز تجاوزیگه قرشی مدافعه قیلیشگه تیار» اېکنینی بیلدیرگن.
اوشبو واقعهلر پاکستان واسطهچیلیگیده اېریشیلگن اۉت آچیشنی تۉختهتیش کېلیشوویدن کېینگی ایران و امریکا اۉرتهسیدهگی نوبتدهگی کېسکینلشوو حسابلنهدی.
سۉنگگی هفتهلرده ایکّی تامان بیر-بیریگه قرشی بیر نېچه بار هجوملر اویوشتیریب، اۉز ارا روشده صلحنی بوزیشده عیبلب کېلماقده.
