قطر تشقی ایشلر وزیرلیگی ایران و امریکا اۉرتهسیدهگی کېلیشوونی کفالتلش اوچون ایرانگه۱۲ میلیارد دالر پشنهاد قیلینگنلیگی حقیدهگی خبرلرنی رد اېتدی و اولرنی مطلقا اساسسیز دېب بیلدیردی.
وزیرلیک سۉزلاوچیسی ماجد الانصاری ایکس اجتماعی ترماغیده یازیشیچه، بوندهی خبرلر کېلیشوونی بوزیش و منطقهدهگی کېسکینلیکنی کمهیتیریشگه قرهتیلگن دیپلوماتیک سعی-حرکتلرنی ضعیفلشتیریشگه اورینگن تامانلر طرفیدن ترقهتیلماقده.
اونینگ ایتیشیچه، قطر دیپلوماتیک رۉلی الّهقچان انیق و رسمي طرزده حجتلشتیریلگن بۉلیب، بوندهی دعوالر قطرنی خلقارا تینچلیک واسطهچیسی صفتیدهگی ایشانچیگه پوتور یېتکزیشگه قرهتیلگن «امیدسیز اورینیش» حسابلنهدی.
شو بیلن بیر وقتده، ایران پارلمانی رئیسی محمد باقیر قالیباف و تشقی ایشلر وزیری عباس عراقچی قطرگه قیلگن تشریفی وقتیده۱۲ میلیارد دالرلیک موزلهتیلگن ایران بایلیگیگه اېریشیش مسألهسی محاکمه قیلینگنلیگی حقیده هم خبرلر ترقهلگن.
ایراننینگ «شرق» گزېتهسی اېسه مذاکره گروهیدهگی منبعگه تهیهنیب، ایران موزلهتیلگن۲۴ میلیارد دالرلیک بایلیگینینگ یرمی مذاکرهلر باشلنیشیده، قالگن قِسمی اېسه۶۰کون ایچیده باسقیچمه-باسقیچ آچیلیشی کېرهکلیگینی بیلدیرگنینی یازگن.
سۉنگّی کونلرده ایران و امریکا اۉرتهسیدهگی کېلیشوو یکوني باسقیچگه یقینلشگنی، ایران اېسه موزلهتیلگن بایلیگینینگ آچیلیشینی کېلیشوونینگ اساسي شرطلریدن بیری صفتیده ایلگری سورهیاتگنی ایتیلماقده.
