ایران تشقی ایشلر وزیرلیگینینگ اعلانیگه کۉره، پاکستان اردو کوچلری قوماندانی عاصم منیر تهرانگه قیلگن سفری چاغیده ایران تشقی ایشلر وزیری عباس عراقچی بیلن اوچرهشیب، ملاقات اۉتکزگن.
مذکور وزیرلیکنینگ بیاناتده ایتیلیشیچه، بو اوچرهشوو جمعه کونی (۱-جوزا) بۉلیب اۉتگن و «کېچ تونیگچه دوام اېتگن».
ایران تشقی ایشلر وزیرلیگی معلوماتیگه کۉره، تامانلر منطقهده کېسکینلیکنی کمهیتیریش، امریکا و اسرایل بیلن باغلیق ماجرالرنی تۉختهتیش، همده غربي آسیاده تینچلیک و برقرارلیکنی مستحکملش یۉللرینی محاکمه قیلگن.
بو پاکستان اردو کوچلری قوماندانی عاصم منیرنینگ سۉنگگی۴۰ کون ایچیدهگی تهرانگه ایکّینچی تشریفی دیر. او اوّلراق هم ایران رسميلری بیلن امریکا قۉشمه ایالتلری بیلن باغلیق ضدیتلر و اوروشنی تۉختهتیش مسألهلرینی محاکمه قیلگن اېدی.
ایران تشقی ایشلر وزیرلیگینینگ سۉزلاوچیسی اسماعیل بقایی اوشبو تشریفنی ایران و امریکا اۉرتهسیدهگی واسطهچیلیک حرکتلری نینگ دوامی دېب تعریفلهگن.
شونینگدېک، پاکستان ایچکی ایشلر وزیری محسن نقوی هم حاضر تهرانده بۉلیب، سۉنگّی کونلرده ایران رسميلری بیلن بیر نېچه بار اوچرهشوو اۉتکزگن.
ایران عاموی اخبارات واسطهلریگه کۉره، او مسعود پزشکیانگه هم پاکستان تامانی نینگ منطقهدهگی وضعیت و مذاکرهلرنی دوام اېتتیریش ضرورتی حقیدهگی فکرلرینی یېتکزگن. خبرلرگه کۉره، پاکستان حاضرده ایران و امریکا اۉرتهسیدهگی رسمي مذاکرهلرده واسطهچیلیک رۉلینی بجریشگه حرکت قیلماقده.
