ایران تشقی ایشلر وزیرلیگی اۉرین باسری کاظم غریب آبادینینگ ایتیشیچه، امریکا قۉشمه ایالتلری ایرانگه هجومنی مذاکرهلرگه امکان بېریش اوچون «وقتینچه» تۉختهتگنینی بیلدیرگن، بیراق بیر وقت نینگ اۉزیده ایستهلگن پیتده کېنگ کۉلملی هجوم باشلشگه تیارلیگینی هم ایتگن.
اېران تشقی ایشلر وزیری اۉرینباسری بوگون (سهشنبه، ۲۹-ثور) ایکس اجتماعی ترماغیده یازگن پستیده: «بو تهدیدنی تینچلیک امکانیتی دېب اتش دېگنی دیر»، دېب یازگن.
او ینه شوندهی قۉشیمچه قیلگن: «ایران هر قندهی حربي تجاوزگه قرشی بیرلشگن و قطعي طرزده تیار توریبدی. بیز اوچون تسلیم بۉلیش دېگن توشونچه یۉق؛ یا غلبه قیلهمیز، یا شهید بۉلهمیز.»
امریکا قۉشمه ایالتلرینینگ جمهور رییسی دونالد ترامپ تیناوون کېچقورون قطر، بیرلشگن عرب امیرلیگی و سعودیه عربستانی التماسیگه بناءً ایرانگه قرشی رېجهلشتیریلگن هجومنی کېچیکتیرگنینی اعلان قیلگن اېدی.
امریکا جمهور رییسینینگ ایتیشیچه، هجوم اېرتهگه عملگه آشیریلیشی رېجهلشتیریلگن بۉلگن، بیراق اوشبو دولتلر جدّي مذاکرهلر دوام اېتهیاتگنی و اریکا همده یقین شرق مملکتلری اوچون مقبول بۉلهدیگن کېلیشووگه اېریشیلیشی ممکنلیگینی بیلدیرگن.
شو بیلن بیرگه، دونالد ترامپ امریکا اوردوسیگه اگر مقبول کېلیشووگه اېریشیلمسه، ایستهلگن پیتده ایرانگه قرشی کېنگ کۉلملی و تۉلیق هجوم باشلشگه تیار توریش حقیده بویروق بېرگنینی ایتدی.
