ایران جمهور رییسی مسعود پزشکيان، پاکستان ایچکی ایشلر وزیری محسن نقوی بیلن اوچرهشووده پاکستان، افغانستان و عراق ایرانگه قرشی اۉز توپراغلریدن فایدهلنیلیشیگه یۉل قۉیمهگنینی ایتدی.
صدا و سیما خبرگزارلیگی گزارشیگه کۉره، بوگون (یکشنبه، ۲۷ثور) بۉلیب اۉتگن اوچرهشووده پزشکيان اوشبو اوچ دولتگه منّتدارلیک بیلدیرگن.
او شوندهی دېگن: «دشمنلر ترورچی گروهلرنی قۉللب-قوّتلش آرقهلی مملکت ایچیگه بېقرارلیک آلیب کیریشگه حرکت قیلدیلر، بیراق ایران قۉشنیلرینینگ اۉز توپراغلریدن مملکتیمیزگه قرشی فایدهلنیلیشینینگ آلدینی آلیشدهگی همکارلیگی و مسوولیتلی یاندشووی قدرلی و تحسینگه لایق ایش بۉلدی.»
ایران جمهور رییسی ینه ایران منطقهدهگی اسلامي دولتلر بیلن صمیمي، برقرار و یخشی قۉشنیچیلیک اساسیدهگی مناسبتلرنی ایستشینی ایتیب، امریکا و اسرایل «دایما نزاعلر چیقریش و ایشانچسیزلیک یرهتیش لایحهلری آرقهلی اسلامي دولتلرنی بیر-بیریگه قرشی قۉییشگه حرکت قیلگنینی» تأکیدلهگن.
پاکستان امریکا و اسرایل نینگ ایرانگه قرشی اوروشی دوامیده واسطهچیلیک رۉلینی اۉینهگن و پاکستان ایچکی ایشلر وزیرینینگ تهرانگه سفری امریکا پیاملرینی یېتکزیش همده ایران جوابینی آلیش مقصدیده عملگه آشیریلگنی ایتیلماقده.
افغانستاندهگی طالبان هم اوشبو اوروش دوامیده امریکا و اسرایل نینگ ایرانگه هجوملرینی قارهلهگن، بیراق بیر وقت نینگ اۉزیده اېراننینگ منطقهدهگی عرب دولتلریگه قرشی هجوملرینی هم تنقید قیلگن.
