سیانان تلویزیون کانالی امریکانینگ «استخبارات معلوماتلریگه اېگه منبعلر»گه تهیهنیب خبر بېریشیچه، مجتبی خامنهای تشقی عامهوي میداندن اوزاق بۉلیشیگه قرهمهی، اوروش و مذاکرهلر استراتیژيسینی ایشلب چیقیشده هنوز مهم رۉل اۉینهماقده.
اوشبو یېتکرمه بوگون (شنبه، ۱۹ثور) بېرگن خبرده ایتیلیشیچه، ایراننینگ ینگی رهبری حکومت نینگ یوقاری منصبدار شخصلری بیلن بیرگه «اوروش استراتیژيسینی شکللنتیریشده مهم رۉل» اۉینهماقده.
منبعلرگه کۉره: «ایراننینگ پرچهلنیب کېتگن رېجیمیده وکالتلرنینگ انیق چېگرهلری معلوم اېمس، بیراق مجتبی خامنهای احتمال ایران–امریکا مذاکرهلرینی باشقریش یۉنهلیشیگه یاردم بېرماقده.»
اولرنینگ ایتیشیچه، امریکا استخباراتی همجمعیتی حاضرگچه ایران رهبرینینگ یشش جایینی انیقلهی آلمهگن.
بیر منبع نینگ تأکیدلشیچه، اونینگ استخباراتدن یشیرینیب قالیشی نینگ سببی «او هېچ قندهی الکترون علاقه واسطهسیدن فایدهلنمهیدی» و فقط شخصن اوچرهشوو یاکه خبرچیلر آرقهلی ملاقات قیلهدی.
ینه بیر منبع مجتبی خامنهای جدّي جراحتلر، جملهدن تنهسی نینگ بیر تامانیده یوز، قۉل، یان و آیاق قِسملریده آغیر کوییشلر سببلی دوالنهیاتگنینی بیلدیرگن.
ایران رهبری ادارهسی رهبری مظاهر حسینی جمعه کونی خامنهای ساغهییش جریانیده اېکنینی ایتگن.
اونینگ سۉزلریگه کۉره: «رهبر حاضر تۉلیق ساغلام، آیاغی و بېلیده یېنگیل جراحت بار، قولاغی آرقهسیگه کیچیک پرچهلنمه تېگگن، اما جراحتلر توزلهماقده.»
مجتبی خامنهای ایران رهبری اېتیب تنلنگنیدن کېین عامه آلدیده کۉرینمهگن و اوندن هېچ قندهی آواز، رسم یاکه ویدېو هم نشر قیلینمهگن.
ایران یوقاری منصبدارلریدن مسعود پزشکیان اېسه اۉتگن هفته مجتبی خامنهای بیلن ایکّی یریم ساعتلیک اوچرهشوو اۉتکزگنینی بیرینچی بۉلیب معلوم قیلگن.
