ایران تشقی ایشلر وزیرلیگی سۉزلاوچیسی اسماعیل بقایی، ایراننینگ امریکا بیلن مذاکرهلرنینگ ایکّینچی باسقیچیده اشتراک اېتیش بۉییچه حاضرچه هېچ قندهی رېجه یۉقلیگینی و بو بارهده قرار قبول قیلینمهگنینی ایتدی.
او بوگون (دوشنبه، ۳۱-حمل) مطبوعات انجمنیده سۉزلب، امریکانینگ بیر تاماندن دیپلوماتيک و مذاکرهگه تیارلیک حقیده گپیریشی، ایکّینچی تاماندن اېسه «جدّي دیپلوماتیک جریاننی کۉرسهتمهیدیگن خطی-حرکتلر» قیلهیاتگنینی تأکیدلهدی.
بقايینینگ ایتیشیچه، ایران باشیدن بېری کېلیشوو و اۉت آچیشنی تۉختهتیش جریانیده امریکانینگ «وعدهنی بوزیشی» و «ناراضیلیک بیلدیریشی»گه دوچ کېلگن.
او دېنگیز بلاکدهسی و اېران کېمهسیگه هجومنی اۉت آچیشنی تۉختهتیش کېلیشووی نینگ آچیق-آیدین بوزیلیشی دېب اتهدی و دېنگیز بلاکدهسی «تجاوزکار حرکت» اېکنینی بیلدیردی.
اونینگ سۉزلریگه کۉره، حاضرگی وضعیتده امریکانینگ گپلری و حرکتلری اۉرتهسیده هېچ قندهی ماسلیک یۉق، بو اېسه ایراننینگ امریکانینگ نیتلریگه بۉلگن شبههسینی ینه-ده کوچهیتیرماقده.
اسماعیل بقایینینگ قۉشیمچه قیلیب ایتیشیچه، ایران ملي منفعتلرنی حسابگه آلگن حالده کېینگی قرارنی احتیاطکارلیک بیلن قبول قیلیشینی ایتدی.
شو آرهده، امریکا جمهور رییسی دونالد ترامپ وکیللری مذاکرهلر اوچون اسلام آبادگه یۉل آلیشی حقیده معلوم قیلگن.
پاکستان عامهوي اخبارات واسطهلری هم چېت اېل هیئتلری کېلیشی مناسبتی بیلن کوچلی خوفسیزلیک چارهلری کۉریلگنی و اَیریم یۉللر وقتینچه یاپیلگنینی خبر قیلگن.
