پاکستان عامهوي اخبارات واسطهلرینینگ خبر بېریشیچه، ایران و امریکا اۉرتهسیدهگی مذاکرهلرنینگ ایکّینچی باسقیچی اۉتکزیلیشی حلی ناانیق بۉلسه-ده، پاکستان اوشبو مذاکرهلرگه مېزبانلیک قیلیشگه تیارگرلیک کۉرماقده.
«دان» گزېتهسی اۉز وېبسایتیده نشر اېتیلگن فوتوصورتلرگه تهیهنیب یازیشیچه، پایتخت اسلام آبادده قطعي خوفسیزلیک چارهلری جاري اېتیلگن.
اوشبو خبرگه کۉره، اسلام آباد و راولپیندی شهرلریده جماعت ترانسپورتی وقتینچه تۉختهتیلگن.
شونینگدېک، اسلام آباد خلقارا اسلام بیلیم یورتی دوشنبه (۳۱-حمل)دن جمعهگچه برچه درسلر آنلاین شکلده اۉتکزیلیشینی اعلان قیلگن.
ایران و امریکا اۉرتهسیدهگی ایکّی هفتهلیک صلح مدتی یقینلشر اېکن، پاکستاننینگ ایکّی تامان اۉرتهسیدهگی مذاکرهلرنی قَیته باشلش بۉییچه سعی-حرکتلری هم کوچهیگن.
ایران و امریکا رسميلری پاکستان آرقهلی اۉز ارا خبر المشیش و مذاکرهلرنی تصدیقلهگن، بیراق ایکّینچی روند یوزمه-یوز اوچرهشوولر اوچون انیق سنه حلی اعلان قیلینمهگن.
پاکستان پایتختی اسلام آباد اۉتگن هفته ایران و امریکا اۉرتهسیدهگی بیرینچی مذاکره روندیگه مېزبانلیک قیلگن اېدی، بیراق اوشبو مذاکرهلر 21 ساعت دوام اېتیب، نتیجهسیز یکونلنگن.
مذاکرهلرنی قَیته باشلش اورینیشلری کوچهییب بارهیاتگن بیر پیتده، هرمز بۉغازیدهگی کېسکینلیک آرتیشی بیلن اوروش قَیته باشلنیشی حقیدهگی خواطرلر هم کوچهیماقده.
