ایران تشقی ایشلر وزیرلیگی مطبوعات سۉزلاوچیسی اسماعیل بقایینینگ ایتیشیچه، ایران و امریکا اۉرتهسیده خبر المشینووی پاکستان آرقهلی دوام اېتماقده.
بقايی بوگون (چهارشنبه۲۶ حمل) اۉتکزیلگن مطبوعات انجمنیده شوندهی دېدی: «یکشنبه کونی ایران اسلام جمهوریتی هیئاتی تهرانگه قَیتگنیدن بېری بوگونگچه پاکستان واسطهچیلیگی آرقهلی کۉپلب خبرلر المشیلدی. بیزنینگ موضعلریمیز جوده انیق، بو هم اۉشه یېرده بیان قیلینگن، هم اوشبو المشینوولر دوامیده.»
او، شونینگدېک، حاضرده ایران و امریکاراۉرتهسیدهگی یگانه واسطهچی پاکستان اېکنینی و خبر المشینووی فقط شو مملکت آرقهلی عملگه آشیریلهیاتگنینی ایتدی. شو بیلن بیرگه، تورلی دولتلر ایکّی تامان بیلن کېسکینلیکنی کمهیتیریش مقصدیده ملاقات آلیب بارهیاتگنینی قۉشیمچه قیلدی.
ایران تشقی ایشلر وزیرلیگی مطبوعات سۉزلاوچیسی شونینگدېک، اۉت آچیشنی تۉختهتیش مدتینی اوزهیتیریش و یقین کونلرده مذاکرهلرنی قَیته باشلش احتمالی حقیدهگی خبرلرنی رد اېتیب، مذاکرهلر اوچون انیق سنه بېلگیلنمهگنینی بیلدیردی.
اوّلراق امریکا جمهور رییسی دونالد ترامپ اېران بیلن مذاکرهلرنینگ ایکّینچی باسقیچی یقین ایکّی کون ایچیده اسلام آبادده اۉتکزیلیشی ممکنلیگینی ایتگن اېدی.
ایران و امریکا اۉرتهسیدهگی مذاکرهلرنینگ بیرینچی باسقیچی هفتهنینگ باشیده پاکستاننینگ اسلام آباد شهریده اۉتکزیلگن، بیراق او نتیجهسیز یکونلنگن.
