ایران عامهوي اخبارات واسطهلرینینگ خبر بېریشیچه، تهرانده «قدس کونی» یۉل یوریشی بیلن بیر وقتده شهرده بیر نېچته پارتلش صادر بۉلگن.
ایرنا اخبارات آژانسینینگ نشر قیلگن ویدیوسیگه کۉره، اوشبو پارتلشلردن بیری تهراندهگی ولیعصر میدانیده، یوریش اۉتکزیلهیاتگن جای یقینیده یوز بېرگن.
یوریش اۉتکزیلهیاتگن حدودلرگه یقین بۉلگن باشقه بیر نېچه جایلرده هم پارتلشلر صادر بۉلگنی حقیده خبرلر ترقهلگن.
ترقهلگن ویدیولرده پارتلش آوازلری اېشیتیلیب، آسمانگه توتون کۉتریلهیاتگن پیتده کۉچهلرده بۉلگن آدملر «الله اکبر»، «امریکاگه اۉلیم» و «اسرایلگه اۉلیم» کبی شعارلرنی ایتهیاتگنی کۉرینهدی.
ایران یېتکرمهلری «قدس کونی» یوریشیده مملکتنینگ بیر قطار یوقاری لوازملی عملدارلری هم قتنهشگنینی کۉرستگن. اولر آرهسیده جمهور رییس مسعود پزشکیان، قوه قاضیه باشلیغی غلام حسین محسنی اژهای، علی لاریجاني ملي خوفسیزلیک عالي کېنگشی کاتبی و تشقی ایشلر وزیری عباس عراقچی بار.
اوشبو خبرلرگه کۉره، «قدس کونی» یوریشلری بوگون ایراننینگ تورلی شهرلریده، جملهدن تهران، اصفحان، قوم، شیراز و کیرمانده کېنگ خلق اشتراکیده اۉتکزیلگن.
ایراننینگ ینگی رهبری مجتبی خامنهای کېچه اعلان قیلینگن ایلک یازمه پیامیده مملکت خلقینی «قدس کونی» یوریشیده قتنهشیشگه چقیرگن اېدی.
