پاکستان یېتکرمهلر مملکتنینگ بلوچستان ایالتی۱۲ نقطهگه اویوشتیریلگن موافقلشتیریلگن هجوملر عاقبتیده کمیده ۱۰ کیشی خوفسیزلیک خادیمی و ۵۸نفر «ترورچی» اۉلدیریلگنینی خبر قیلدی.
جیو نیوز پاکستان خوفسیزلیک منبعلریگه تهیهنیب، اوشبو هجوملر تیناوون کېچهسی (جمعه،۱۰ دلو) بلوچستانده عملگه آشیریلگنینی معلوم قیلدی.
پاکستان خوفسیزلیک منبعلرینینگ ایتیشیچه، هجوملر «هند فتنهسی» تامانیدن اویوشتیریلگن. بو اتَمه پاکستان رسميلری تامانیدن «بلوچستان آزادلیک اوردوسی» دېب اتهلووچی گروهگه نسبتاً قۉللنهدی.
جیو نیوز خبریگه کۉره، اوشبو منطقهلرده تازهلش عملیاتلری حلی هم دوام اېتماقده، بیراق کېچهگی هجوملر پاکستان کوچلرینینگ اۉز وقتیده حرکتی طفیلی برهم تاپگن.
پاکستان ایچکی ایشلر وزیری محسن نقوينینگ ایتیشیچه، مملکت عسکرلری «ترورچیلرنینگ یاووز نیتلرینی» برباد قیلگن.
بلوچستان ایالتینینگ باش وزیری سرفراز بوگتی هم هجوملر اوشبو ایالتنینگ چېگره کوچلری و پولیسی همکارلیگیده برطرف اېتیلگنینی بیلدیردی.
اوشبو هجوملر پاکستان اوردوسی بلوچستانده ایکّی علیحده عملیات دوامیده۴۱ کیشی«ترورچی» یۉق قیلینگنینی اعلان قیلگنیدن بیر کون اۉتیب صادر بۉلگن.
بلوچستان افغانستان بیلن چېگرهداش بۉلیب، خیبر-پختونخوادن کېین پاکستاندهگی اېنگ بېقرار ایالت حسابلنهدی.
پاکستان حکومتی قۉزغآلانچیلر اوشبو منطقهلرده هجوملرنی افغانستان توپراغیدن فایدهلنگن حالده عملگه آشیرهیاتگنینی دعوا قیلماقده.
افغانستاندهگی طالبان اېسه پاکستانگه قرشی افغانستان توپراغیدن فایدهلنیلهیاتگنینی رد اېتیب، پاکستان رسميلرینی مملکت خوفسیزلیگینی تأمینلهی آلمسلیکده عیبلهماقده.
