ایران تشقی ایشلر وزیری عباس عراقچی، امریکا جمهور رییسی دونالد ترامپنینگ بیاناتلریگه جوابن، مملکتی هم اوروشگه، هم مذاکرهلرگه تیارلیگینی بیلدیرگن.
صدا وسیمانینگ گزارشیگه کۉره، عراقچی بوگون (دوشنبه، ۲۲جدی) تهرانده استقامت قیلووچی چېت اېللیک اېلچیلر بیلن اوچرهشووده ایران اوروشنی خواهلهمسلیگینی، اما اوروشگه تۉلیق تیار اېکنلیگینی ایتگن.
شونینگدېک، او «عدالتلی، شرَفلی، تېنگ مقامده، اۉز ارا حرمت و منفعتلر اساسیده» مذاکرهلرگه هم تیار اېکنلیگینی بیلدیرگن.
دونالد ترامپ اېسه بوگون تانگده ایران رهبرلری اونینگ بیلن باغلنگنینی و مذاکره قیلیشنی خواهلشلرینی ایتگن. ترامپ، اوچرهشوو بېلگیلنگن بۉلسه-ده، صادر بۉلهیاتگن واقعهلر طفیلی اوچرهشوودن آلدین چارهلر کۉریشگه مجبور بۉلیشی ممکنلیگینی قۉشیمچه قیلگن.
سۉنگی کونلرده ایران ایچیدهگی ناراضیلیکلر یانیده، ترامپ حکومت ناراضیلرنی باستیرسه، امریکا تامانیدن «جدّي ضربه» بېریلیشی بیلن تهدید قیلگن اېدی.
عراقچی اېلچیلر بیلن اوچرهشووده مملکتدهگی ناراضیلیکلرگه هم اعتبار قرهتگن: «بیز بیر مدت نمایشلر اۉتکزدیک، کېینچهلیک اېسه ترور حرکتلری صادر بۉلدی و بو ایکّی حالتنی فرقلش کېرهک،» دېگن او.
شونینگدېک، او ایران نینگ سۉنگی کونلردهگی «ترور حرکتلری»گه امریکا و اسراییل نینگ ارهلشووی بیلن باغلیق کۉپلب حجت و دلیللرگه اېگه اېکنلیگینی ایتگن.
وزیر بو «ترور حرکتلرینی» برچه اوچون کتّه تهدید دېب اتب، باشقه تهدیدلر یۉقلیگیگه ایشانچ حاصل قیلینمهگونچه اَیریم چېکلاولر دوام اېتیشینی بیلدیرگن.
بوگون ایران ایچیدهگی عامهوي ناراضیلیکلر اۉن آلتینچی کونیگه کیرگن. حکومت ناراضیلیکلر کېنگهیگنیدن سۉنگ پنجشنبه کېچیدن باشلب بوتون مملکتده اینترنتنی اوزیب قۉیگن.
اینترنت نینگ بوتونلهی اوزیلیشی دوام اېتهیاتگن بیر پیتده، خلق ارا انسان حقوقلری تشکیلاتلری دولت کوچلری تامانیدن ناراضیلرنی کېنگ قمراولی باستیریشیدن خواطر بیلدیرماقده.
