ایران پارلمانی باشلیغی محمدباقر قالیبافنینگ ایتیشیچه، اگر امریکا بو مملکتگه حربي هجوم قیلسه، ایران اسراییلنی، شونینگدېک منطقهدهگی امریکانینگ برچه حربي مرکزلری، پایگاهلری و کېمهلرینی اۉزینینگ قانوني نشانلری دېب حسابلهیدی.
قالیباف بوگون (یکشنبه، ۲۱جدی) ایران پارلمانی ییغیلیشیده سۉزگه چیقیب، ایران فقط هجومدن کېینگی جواب بیلن چېکلنمسلیگینی، بلکه رئال تهدید بېلگیلریگه اساسلنیب آلدیندن حرکت قیلیشینی تأکیدلهدی.
او امریکا جمهور رییسی دونالد ترامپ و منطقهدهگی اونینگ اتفاقچیلریگه مراجعت قیلیب شوندهی دېدی؛ «حساب-کتابده خطا قیلمنگ، پُشیمان فایده بېرمهیدی»
دونالد ترامپ اېسه ایراندهگی ناراضیلیک نمایشلریگه مناسبت بیلدیرر اېکن، اگر ایران حکومتی نمایشچیلرنی عامهوي روشده اۉلدیریشگه قۉل اورسه، امریکا تامانیدن قتّيق ضربه بېریلیشینی ایتگن.
نیویورک تایمیز هم ترامپ سۉنگگی کونلرده ایرانگه حربي هجوم قیلیش بۉییچه ینگی وریانتلر بیلن تنیشتیریلگنی حقیده خبر بېرگن.
نشر نینگ یازیشیچه، امریکا جمهور رییسی حاضرچه یکوني قرار قبول قیلمهگن، بیراق نمایشلرنی باستیریشگه جوابن ایرانگه هجوم قیلیشگه رخصت بېریش مسألهسینی جدّي کۉریب چیقماقده.
ایرانده ناراضیلیک نمایشلری ایکّی هفتهدن آرتیق وقت دوام اېتیب، حکومتگه قرشی حرکت توسینی آلگن.
ایران رسميلری نمایشچیلرنی «ترتیبسیزلیکچیلر» دېب اتب، اولرنینگ اۉنلب یېتکچیلری و گروه باشلیقلری حبسگه آلینگنینی معلوم قیلگن.
ایران یېتکرمهلری هم نمایشچیلر تامانیدن بیر قطار خوفسیزلیک کوچلری اۉلدیریلگنی، شونینگدېک تورلی منطقهلرده جماعت ملکیگه ضرر یېتکزیلیب، یاقیب یوباریلگنی حقیده خبر بېرگن.
شو بیلن بیرگه، خارجده جایلشگن ایران انسان حقوقلری تشکیلاتی معلوماتیگه کۉره، ایران خوفسیزلیک کوچلری تامانیدن 50 دن آرتیق نمایشچی اۉلدیریلگن، ایکّی مینگدن زیاد کیشی اېسه یرهلنگن.
