اطلاعات روز: شماری از مقام‌های ارشد دولت تاجیکستان اعلام کرده‌اند که 1500 تروریست از گروه‌های مختلف در ولایت‌های شمالی و مرزی افغانستان با تاجیکستان تجمع کرده‌اند.
این مقام‌ها تجمع این تروریستان را در ولایت‌های هم‌مرز با تاجیکستان خطری جدی برای کشورهای منطقه عنوان کرده‌اند. یک مشاور امنیتی رییس جمهور تاجیکستان و یک مقام بلند‌رتبه‌ی امنیتی کشورهای مستقل مشترک‌المنافع گفتند که در آن‌سوی سرحد تاجیکستان در خاک افغانستان تعداد زیادی از شورشیان مربوط به گروه‌های مختلف افراطی جمع شده‌اند.
شیرعلی خیراللهیف، مشاور امنیت ملی رییس جمهور تاجیکستان دیروز در شورای فرماندهی سرحدی کشورهای مستقل مشترک‌المنافع در شهر دوشنبه گفت: «بزرگ‌ترین مسئولیت امروز و فردا این است که از رقابت‌های جیوپلیتیکی قدرت‌های بزرگ در آسیای میانه جلوگیری شود؛ زیرا این منطقه روز‌به‌روز با تهدید بیشتر تروریسم رو‌به‌رو می‌باشد». خیراللهیف افزود که گروه‌های تروریستی به گونه‌ی آشکار تلاش دارند تا در مناطق مرزی افغانستان و تاجیکستان مرکز جنگی ایجاد کنند.
هم‌چنان رجب علی رحمان علی، فرمانده قوای مرزی تاجیکستان در یک نشست خبری گفت که افراد مسلح افراطی در سه ولایت شمالی و شمال‌شرقی افغانستان تمرکز کرده و تعداد آن‌ها به بیش از ۱۵۰۰ نفر می‌رسد. او گفت: «ما را به‌خصوص وضع در قندوز، تخار و بدخشان افغانستان که هم‌مرز با تاجیکستان هستند، نگران کرده است. زیرا در این ولایت‌ها از ماه اپریل به این‌سو زدوخوردها قطع نمی‌شوند. مقام‌های تاجیکستان و افغانستان پیوسته در مورد وضع منطقه‌های مرزی تبادل اطلاعات می‌کنند و در این زمینه همکاری‌های گسترده را آغاز کرده‌اند».
رحمان علی افزود که تعداد افراد مسلح تندرو در ولسوالی‌های امام صاحب و دشت ارچی ولایت قندوز نیز زیاد می‌باشد. به گفته‌ی این مقام تاجیکی، این تروریستان به گروه‌های طالبان، القاعده، داعش، حرکت اسلامی ازبکستان و انصارالله منسوب می‌باشند.
پیش از این نیز مقام‌های تاجیکستان و دیگر کشورهایی که از شمال با افغانستان مرز مشترک دارند، از نفوذ گروه‌های تروریستی شکایت کرده‌اند. آن‌ها هشدار داده‌اند در صورتی که برنامه‌‌ی منظم برای کنترول فعالیت‌های این تروریستان از سوی کشورهای منطقه روی دست گرفته نشود، در آینده مشکلات بزرگی را برای این کشورها به وجود خواهد آورد.
از سویی هم، در ماه‌های اخیر مقام‌های افغانستان نیز از حضور گسترده‌ی گروه‌های تروریستی در ولایت‌های شمالی کشور ابراز نگرانی کرده‌اند. در حال حاضر در شماری از ولایت‌های شمال‌شرقی کشور عملاً جنگ میان نیروهای امنیتی کشور و گروه‌های تروریستی جریان دارد و تلفات ناشی از درگیری‌ها نیز گسترده بوده است.
