کمیته امنیت ملی تاجیکستان اعلام کرده است که سه عضو «سازمان تروریستی» که از خاک افغانستان نفوذ کرده بودند، در درگیری با مرزبانان تاجیک کشته شدهاند.
به گزارش خبرگزاری خاور تاجیکستان، در این درگیری دو سرباز نیروهای مرزی تاجیکستان نیز کشته شدهاند.
در بیانیهی کمیته امنیت ملی تاجیکستان آمده است که بهتاریخ (سهشنبه، ۲ جدی) سه عضو یک سازمان تروریستی از مرز افغانستان عبور کرده و وارد خاک جمهوری تاجیکستان در منطقهی حفاظتشدهی پاسگاه مرزی در منطقهی قاووق ولسوالی شمسالدین شاهین ولایت ختلان شدند.
به نقل از بیانیه، در نتیجهی اقدامات عملیاتی-تحقیقاتی، «محل تروریستان در خاک جمهوری تاجیکستان» دیروز مشخص شد.
در بیانیه آمده است که تروریستان از دستور تسلیم مرزبانان تاجیک اطاعت نکرده و مقاومت مسلحانه کردند. گفته شده است که افراد مسلح قصد داشتند به یکی از پاسگاههای مرزی نیروهای مرزی کمیته امنیت ملی حملهی مسلحانه انجام دهند.
این کمیته گفته است که در نتیجهی عملیات رزمی، هر سه تروریست خنثی شدند و سه تفنگ ام-۱۶، یک تفنگ کلاشینکف، سه تفنگچه با صداخفهکن، ۱۰ نارنجک دستی، دوربین دید در شب، مواد منفجره و سایر مهمات از محل حادثه کشف و ضبط شده است.
کمیته امنیت ملی تاجیکستان گفته است که در جریان درگیری مسلحانه و جلوگیری از این اقدام تروریستی، دو سرباز نیروهای مرزی تاجیکستان کشته شدند.
این کمیته اضافه کرده است که در ماه گذشته، این سومین مورد حملهی مسلحانه، اقدام تروریستی و عبور از مرز از افغانستان به تاجیکستان است که در نتیجهی آن غیرنظامیان و پرسنل نظامی کشته شدند.
کمیته امنیت ملی تاجیکستان گفته است که این حقایق ثابت میکند که طالبان در انجام تعهدات بینالمللی و وعدههای مداوم خود برای تأمین امنیت و ثبات در مرز با جمهوری تاجیکستان و مبارزه با اعضای سازمانهای تروریستی، بیمسئولیتی میکنند.
این کمیته اضافه کرده است که نیروهای مرزی کمیته دولتی امنیت ملی جمهوری تاجیکستان امیدوار اند که رهبری دولت طالبان از مردم تاجیکستان عذرخواهی کرده و اقدامات مؤثر دیگری را برای تأمین امنیت مرزهای مشترک با تاجیکستان انجام دهد.
دفتر ریاستجمهوری تاجیکستان در اوایل ماه قوس اعلام کرده بود که در هفته اخیر دو حمله از افغانستان در خاک آن کشور انجام شده است.
یکی از این حملات، سه شهروند چین که برای یک شرکت خصوصی کار میکردند، کشته شدند.
