عمران خان، نخستوزیر پاکستان میگوید که برای تشکیل یک دولت فراگیر با شمولیت اقوام تاجیک، هزاره و ازبیک مذاکرات و گفتوگو با گروه طالبان را آغاز کرده است.
آقای خان امروز (شنبه، ۲۷ سنبله) در رشتهتویتی گفته است که گفتوگو با طالبان در این مورد را پس از دیدار با رهبران کشورهای همسایهی افغانستان از جمله امامعلی رحمان، رییسجمهور تاجیکستان آغاز کرده است.
او جزئیاتی بیشتری در مورد این مذاکرات ارایه نکرده، اما افزوده است که پس از ۴۰ سال جنگ، حکومت فراگیر صلح و ثبات را در افغانستان تضمین میکند. نخستوزیر پاکستان تأکید کرده است که صلح و ثبات در افغانستان به نفع کشورش و منطقه است.
او همچنین روز گذشته در یک نشست خبری مشترک با امامعلی رحمان در شهر دوشنبه، پایتخت تاجیکستان گفته بود که درگیری میان تاجیکها و طالبان در افغانستان، پاکستان و تاجیکستان را نگران کرده است.
او افزوده بود که دو طرف توافق کردهاند که تاجیکستان به نمایندگی از تاجیکها و پاکستان به نمایندگی از طالبان و یا پشتونها تلاش میکنند تا مسألهی پنجشیر را از طریق گفتوگو حلوفصل کنند.
دیدار دو طرف در حاشیهی نشست رهبران سازمان همکاریهای شانگهای در شهر دوشنبه صورت گرفته بود. در این نشست که روز گذشته با اشتراک ۱۵ کشور برگزار شد، امامعلی رحمان بر ایجاد یک دولت فراگیر در افغانستان تأکید کرد.
رحمان گفت که عملیکردن هر گونه سیستم سیاسی در کابل، بدون در نظرگرفتن افکار عمومی، میتواند عواقب غیرقابل پیشبینی را به دنبال داشته باشد.
رییسجمهور تاجیکستان از جامعه بینالمللی، بهویژه سازمان ملل متحد و کمیته بینالمللی صلیب سرخ خواست که به افغانستان و مردم پنجشیر که دو ماه است در محاصره اند، کمکهای فوری فراهم کنند.
