اطلاعات روز: کونړ کې طالب چارواکي وایي، دغه ولایت کې یې په تیرو څو میاشتو کې د زرګونه چارتراش لرګیو د قاچاق مخه نیولې ده.
کونړ کې د طالبانو والي محمدقاسم خالد تیره ورځ (سې شنبه، ۲۳ د وري) د یو خبري کنفرانس پر مهال ویلي د څو میاشتو په اوږدو کې یې زرګونه فوټه لرګی او لسګونه موټر هم له قاچاق وړونکو نیولې دي.
هغه دغه راز زیاتوي چې په دغه ولایت کې یې د صنعتکارانو په نوم د لرګیو مافیا مخه نیولې او د دوی کارونه یې په ټپه درولي.
د والي په وینا یادې مافیایي ډلې په تېرو څو لسیزو کې د کونړ ځنګلونه په بې رحمانه ډول پرې او لرګي یې قاچاق کړي دي.
خالد زیاتوي:« له کوم وخته چې مونږ کونړ ته راغلي یو، دلته مو ځنګلونو د قطع مخه نیولې او همدارنګه دلته د صنعتکارانو په نامه د لرګیو مافیا فعاله وه، چې په تیرو څو کلونو کې یې دکونړ ځنګلونه وهلي او بیا یې قاچاق کړي دي، خو مونږ ددې مافیا مخه نیولې.»
کونړ کې د نجارۍ لسګونه لوې او کوچنۍ کارخونې شتون لري، چې له تیرو څو لسیزو یې یاد ولایت کې د لرګیو د پروسس برخه کې فعالیتونه کول، خو د تیر جمهوري نظام له نسکوریدو وروسته یې یادې کارخونې طالبانو تړلي او ویلي يې دي، چې دغو کارخونو د قاچاق لپاره زمینه برابره کړې وه.
د هیواد نورو سیمو په شان د کونړ ځنګلونه هم په تیرو څو کلونو کې د مافیایي ډلو له لوري په بې رحمۍ پرې شوي او لرګي یې ګاونډیو هیوادونو ته قاچاق شوې دي.
د کونړ د کرنې ریاست د معلوماتو له مخې، د دغه ولایت ۴۰ سلنه ځنګلونه له منځه تللي او که حکومت ورته پاملرنه ونه کړي پاتې نور هم د له منځه تلو له ګواښ سره مخ دي.
