اطلاعات روز: ارزګان خلک شکایت کوي چې واک ته د طالبانو رسیدو سره سم ارزګان کې نا قانونه زراعتي کلینیکونه او درمل پلورنځي زیات شوي دي.
دوئ وايي خلک د عصري کرنې او مالدارۍ برخه کې مسلکي معلومات نه لري او اړ دی چې د خپلو حاصلاتو د ښه کولو لپاره له دغه کسانو څخه درمل او اړينې مشهورې واخلي.
کروندګر او مالدار وايي که ددغه کسانو مخه ونه نيول شي خلکو ته به اقتصادي زيانونه ورسيږي.
د ترينکوټ دوه اوسيدونکي علي جان او محمدولي له اطلاعات روز سره په خبرو کې د طالبانو د حکومت څخه وغوښتل چې هغه کسان دې د قانون منګولو ته وسپاري چې په غيري قانوني ډول خلکو ته زراعتي او د مالدارۍ درمل ورکوي.
علي جان وایي:« ټول ښار هغه کسانو نېولی چې د حيواناتو او کرنيز درمل پلوري بس د هر چاچې زړه وغواړي يو دوکان جوړ کړي او خلکو ته دغه درمل ورکوي، زموږ خلک په هيڅ هم نه پوهيږي ورته راځي او دواګاني ورڅخه وړي ددي کار مخه دي حکومت ونيسي.»
ورته وخت کې دارزګان د لوړو زده کړو موسېسي د کرهنې د برخې يو تن استاد پوهنیار احمدالله احمدي هم پر دغه چارې انديښمن دی او زياتوي چې خلک دې د هغو کسانو سره سلاح مشورې وکړي چې د کرهنې او مالدارۍ برخه کې زده کړې کړې وي.
دی وايي د کرهنې د عصري کيدو او مالدارۍ د ترويج لپاره په کار ده چې هم حکومت او هم خلک په ګډه کار وکړي.
هغه وايي ډير وخت د غيري فني کسانو لخوا څخه خلکو ته ورکول شوي درمل د ګټې پر ځاي زراعتي بوټو ته زیان رسولی دی.
نوموړي وويل:« دغه ستونزه د افغانستان په ډيرو ولايتونو کې شته په ارزګان کې هم شته چې خلکو ته غيري فني کسان په دي برخه کې لارښوونې کوي چې په زيان تماميږي په تيرو کلونو کې موږ مثالونه لرو چې ډيرکښتونه دغو درملو له منځه وړي دي ددي مشکلاتو د حل لار داده چې باید د فني کسانو يو ټيم جوړ شي او ددغو کسانو نظارت وکړي .»
پر همدي وخت ارزګان ولايت د طالبانو د کرنې او مالدارۍ رياست مسوولین هم تاييده وي چې په يو شمير ځايونو کې غيرې مسلکي کسان پر خلکو درمل پلوري.
ارزګان د طالبانو د کرنې اومالدارۍ رياست د اطلاعات مشر قدرت الله حميدي له اطلاعات روز سره په خبرو کې وويل چې دوئ په دي برخه کې د زراعتي او مالدارۍ درملتونو څخه تاریخ تېره درمل راټول کړي دي او پلان لري ترڅو د هغو کسانو مخه هم ونيسي چې په ښارکې يې پر خپل سرزراعتي کلينکونه خلاص کړي دي.
هغه وايي:«موږ ښار کې يو کمپین ترسره کړی او وخت تيره حيواني او زراعتي درمل مو راټول کړې دی او هغه کسان چې ښار کې غيرې مسلکي حيواني او زراعتي کلينکونه لري یا درمل پلوري موږ يې کلک مخالف یو او مخه به يې ونيسو.»
دارزګان ولايت د کرنې او مالدارۍ ریاست د معلوماتو له مخې په دغه ولايت کې ۸۰ سلنه خلک په کرنه اومالدارۍ بوخت دي او له همدې لارې د ژوند چارې پرمخ وړي.
