اطلاعات روز: د طالبانو حکومت لخوا د بزګر ورځ د حمل یا وري پنځمه نیټه ټاکل شوې وه خو، ارزګان کې دغه ورځ، پرون ولمانځل شوه.
په دغو مراسمو کې ګډون کوونکو کروندګرو په یاد ولایت کې د وچکالۍ پرسختوالي اندېښنه وښوده.
هغوئ اطلاعات روز ته وویل، که یې د کروندو لپاره د اوبو غم ونه خوړل شي، لېرې نه ده چې ډېری محصولات یې د وچکالۍ له امله سخت زیان وویني.
دوئ زیاته کړه چې د اوړي موسم لا نه دی رارسېدلی، خو د دوئ کروندې د اوبو له جدي کمښت سره مخ دي او په وینا یې، په ډېری سیمو کې کرل شوو ځمکو ته اوبه نه رسېږي او له مسوولینو یې د جدي پاملرنې غوښتنه وکړه.
احسان الله یو تن بزګر وایي:« تراوسه ګرمي رارسيدلې نه ده خو، موږ چې دښتو کې کوم حاصلات کرلي و، هغه اوبه نه لري او بیخي کمې دي که حالات دغه ډول دوام وکړي ليري نه ده چې هر څه وچکالي ختم کړي.»
یو بل بزګر شفيع الله وایي: « سږکال موږ خپل کروندي کرلي دي خو لويه ستونزه د اوبو نشتون دی موږ انديښمن يو چې سږکال به موږ خپل د کرل شوو ځمکو څخه حاصل واخلو که نه.»
په ورته مهال په ارزګان کې د طالبانو د کرنې او مالدارۍ رياست چارواکي هم په دغه ولایت کې د وچکالۍ شتون مني، خو په ورته وخت کې له کروندګرو سره په بېلابېلو برخو کې د مرستو خبر ورکوي.
ارزګان کې د طالبانو د کرنې او مالدارۍ رياست د اطلاعاتو مشر قدرت الله حميدي په جوړه شوې غونډه کې وويل چې د باراني اوبو مهارولو لپاره پلان شته او په خبره یې، د چیک ډیمونو په جوړېدو سره به تر یوه حده د وچکالۍ مخه ونیول شي.
دی وايي د يو شمير موسيساتو لخوا څخه اوس په ځينو کليو کې د اوبو د وياليو پاکولو چاري روانې دي.
نموړی زیاتوي « موږ د اوبو مهارولو لپاره د چیک ډیمونو جوړېدو وړاندیز کړی او د بندونو جوړېدو او د پاتې پروژو د پلي کېدو جدي غوښتنه مو کړې ده.»
نه یوازې ارزګان، بلکې سږکال په ډېری ولایتونو کې پر اورښتونو سربېره، بیا هم د وچکالۍ اټکل شوی دی.
