اطلاعات روز: د هلمند ولایت د امنیه قومندانۍ څخه اطلاعات روز ته په رالیږل شوې خبرپاڼه کې راغلي چې د دې ولایت د نوزاد ولسوالي د کشک په کلي کي یوه کس یو کور ته لاسي بم ورغورځولی چې له امله یې یو کس وژل شوی او څلور نور ټپیان شوي دي.
سرچینه وایي، پېښه د شخصي شخړې له کبله رامنځته شوې او هغه کس چې دغه کور ته یې لاسي بم ورغورځولی او ډزې یې کړي، د امنیتي ځواکونو له لوري نیول شوی دی.
په همدې وخت د ارزګان په شهید اساس ولسوالۍ کې هم د یوې شخصي شخړې له امله یو کس وژل شوی دی.
د ارزګان ولایت د اطلاعات او فرهنګ ریس ملا محمد اصف اطلاعات روز سره په خبرو کې وویل چې تیره ورځ د ارزګان په شهید اساس ولسوالۍ کې د دریو کسانو ترمنځ د کورنۍ شخړه رامنځته شوې چې له امله یې یو کس وژل شوی دی.
ملا محمد اصف وویل، هغه دوه کسان چې د وژل شوي کس په قاتل تورن وو، نیول شوي دي.
هغه وایي، دغه کسان تر وژنې وروسته له سیمې تښتیدلې ول، خو د طالبانو تر څیړنو وروسته ونیول شول.
له کله چې طالبان واک ته رسیدلې دي ډیری خلک هڅه کوي چې تیرې حل شوې قضیې یو ځل بیا په خپله ګټه راپورته کړي چې له امله یې دغه ډول پیښې رامنځه کیږي.
