اطلاعات روز: ارزګان کې خلک وايي، د دې ولايت په مرکز ترينکوټ کې تيره ورځ یو شمېر بیوزلو د (WFP) مواد چور کړي دي.
د سیمې يوه اوسيدونکي چې نه يې غوښتل نوم يې واخیستل شي، نن (چهارشنبه، د کب ۱۱) نېټه اطلاعات روز ته وويل چې تيره ورځ د ترينکوټ «مهربات» سيمه کې بیوزلو خلکو په يوه خوله د WFP موسسې خوراکي مواد چې د ANCC موسسې له خوا د ارزګان چنارتو ولسوالۍ ته انتقاليدل چور کړي او له ځان سره يې وړي دي.
هغه وايي، د سیمې خلک چې زيات بیوزله دي اړ شول ترڅو د يادې موسسې خوراکي توکي چور کړي.
د سیمې يوه بل اوسيدونکی حبیب الله بیا پر موسساتو نيوکه کوي او زياتوي چې مرستندويه ارګانونه د مرستو په وېش کې فساد کوي او اړمنو کسانو ته مرستې نه ورکوي.
هغه وايي، د دې سيمو خلکو ته له ډېره وخته مرسته نه ده رسيدلې چې دا مهال د زيات فقر او غربت سره مخ دي.
هغه وویل: «کله چې مرستې کيږي، دغه مرستندويه ارګانونه يې پر خپلو خپلوانو ويشي اړمنو کسانو ته مرستې نه ورکوي، خلک زيات وږي دي. د دغې سیمې خلکو ته له ډيره وخته مرستې نه دي رسيدلي.»
دا چې د خلکو لخوا په څومره اندازه مواد د سیمې خلکو چور کړي، تراوسه يې معلومات نه دي ترلاسه شوي خو د سيمې د خلکو په خبره چې يو غټ موټر خوراکي مواد ول.
اطلاعات روز هڅه وکړه چې د WFP مسوولينو او د ارزګان د طالبانو د چارواکو نظر هم راواخلي خو هغوی په دې اړه زموږ پوښتنو ته هيڅ ځواب رانه کړ.
په ارزګان کې تل پر موسساتو نیوکې وي چې اړمنو خلکو ته د مرستې پر ځای د مرستندويه ارګانونو کارکوونکي خپلو خپلوانو ته مرستې ويشي.
په ارزګان کې د طالبانو د موسسساتو يوه مشر مولوي حسن تر دې مخکې په څو ځله ډاډ څرګند کړی دی چې د غير دولتي موسساتو مرستې پر اړمنو خلکو په شفاف ډول ويشل کيږي.
واک ته د طالبانو له رسيدو وروسته خلک له سخت فقر او غربت سره مخ دي او د بیلابیلو لارو هڅه کوي ترڅو د ځان لپاره يوه ګوله ډوډۍ ترلاسه کړي.
