اطلاعات روز: سرچینو د العربیه انګلیسي ټلوېزیوني شبکې ته ویلي چې د امریکا متحده ایالات په دې هېواد کې د افغانستان ډېپلوماټانو ته ویلي دي چې واشنګټن کې د افغانستان سفارت او لاسانجلس او نیویارک ښارونو کې قنسولګرۍ به یې وتړي.
د دې راپور پر بنسټ، یوې سرچینې دغه راز ویلي، د هغه یاددښت پر بنسټ چې د روانې اونۍ پیل کې د افغانستان ډېپلوماټانو لپاره لېږل شوی، د هغوی ډېپلوماټیک خوندیتوب به هم د امریکا له خوا سلب شي.
خو د امریکا بهرنیو چارو وزارت یو چارواکي العربیه ته ویلي چې «د افغانستان ماموریت وضعیت یا پرسونل کې هېڅ بدلون نه دی راغلی.»
العربیه لیکلي چې د واشنګټن دا ګام له افغانستانه د دې هېواد له ګډوډ وتلو او د طالبانو په لاس د کابل له سقوط شپږ میاشتو کمه موده کې کېږي.
دا په داسې حال کې ده چې واشنګټن کې د افغانستان ډېپلوماټان تازه ویلي چې امریکا د افغانستان سفارت رسمي بانکي حسابونه تړلي دي.
د افغانستان دوه لوړپوړي ډیپلوماټان چې نه یې دې غوښتي نومونه یې واخیستل شي، د امریکا غږ انګلیسي څانګې ته تایید کړې چې واشنګټن کې د افغانستان سفارت او متحده ایالتونو کې د افغانستان دوو قونسلګریو بانکي حسابونه تړلي دي. د دوی په وینا چې د دې تړلکېدو له یوې میاشتې زیاته موده کېږي.
دغو ډیپلوماټانو دغه راز ویلي چې د دې موضوع په اړه امریکایي چارواکو سره په خبرو بوخت دي.
له دې ډیپلوماټانو یوه یې له دې بیان سره چې امریکایي چارواکو ډیپلوماټانو ته سپارښتنه کړې چې د دې موضوع په اړه په ښکاره خبرې و نه کړي، ویلي: «موږ د امریکا بهرنیو چارو وزارت سره خبرې کړي، خو تراوسه هېڅ پرمختګ نه دی شوی.»
د امریکا غږ راپور له مخې، واشنګټن کې د افغانستان استازولي له کابله چې د طالبانو کنټرول کې ده، بودجه نه ترلاسه کوي او تراوسه یې د قنسولي چوپړونو لګښتونو کمولو له لارې خپل کار ته دوام ورکړی دی.
د امریکا غږ په وینا، اوسمهال د امریکا قنسولګریانې یوازې د پاسپورټونو تمدید غوښتنو ته دوام ورکوي او لګښت یې شخصي بانکي حسابونو ته غورځوي او بیا په پای کې د سفارت عواید حسابوي.
د افغانستان ډیپلوماټانو ویلي چې د افغانستان سفارت رسمي بانکي حسابونو تړلو د سفارت په مالي راکړو ورکړو له هغې ډلې په حقوقو، اجاره او د مراقبتي بیمو په ورکړو نامطلوبه اغېز کړی دی.
د امریکا بهرنیو چارو وزارت یو ویاند په دې اړه له څه ویلو ډډه کړې ده؛ خو ویلي یې دي: «د افغانستان ماموریت غړو د اعتبارورکولو وضعیت کې هېڅ کوم بدلون نه دی راغلی.»
