اطلاعات روز: ننګرهار کې د طالبانو امنیتي چارواکي دې ولایت کې د هغه دوه تنو د نیول کیدو خبر ورکوي، چې د دوی په وینا څو ورځې وړاندې یې د یوې کورنۍ ۶ غړي وژلي وو.
ننګرهار کې د طالبانو امنیې قومندانۍ څخه نن (دوشنبه،۲۹ د لیندۍ) اطلاعات روز ورځپاڼې ته په را استول شوې خبرپانه کې راغلي، چې د دوی امنیتي ځواکونو په کوز کونړ ولسوالۍ کې د عبدالجميل او محمد اعظم په نومونو هغه دوه کسان نيولي، چې څو ورځې وړاندې يې د ننګرهار د کوز کونړ ولسوالۍ اړوند« شګې قریه» کې د مولوي ابراهيم په ګډون د هغه د کورنۍ شپږ غړي د تبر او چړو په واسطه وژلي وو.
خبرپاڼې زیاته کړې چې نیول شویو کسانو په خپل جرم اعتراف کړی چې د محکمې له پرېکړې وروسته به د شريعت له مخې ورسره چلند ترسره شي.
دغه پېښه تېره پنجشنبه د روانې لېندۍ میاشتې په ۲۵مه د ننګرهار په ښېوې یا کوزکونړ ولسوالۍ کې رامنځته شوې وه.
هغه وخت ځایي سرچینې اطلاعات روز ته ویلي ول چې یاد کسان د «تبر» او «چړو» په واسطه وژل شوي چې په کې د یادې کورنۍ یوه میرمن او یو ماشوم هم شامل دي.
سرچینې دا هم ویلي ول چې په وژل شویو کسانو کې د یادې کورنۍ هغه ځوان هم شامل دی، چې نیږدې یوه میاشت وړاندې یې واده کړی و.
په دې وروستیو کې د ننګرهار په مرکز او ولسوالیو کې هدفي وژنو او جنایي پېښو زیاتیدو ولسي خلک اندیښمن کړي او په دې برخه کې د امنیتي چارواکو د ځانګړې پاملرنې غوښتنه کوي.
