اطلاعات روز: د طالبانو ملي امنیت ریاست مسوولین وایي، چې د دغه ولايت د قومي مشرانو په منځګړتوب ۸۰ تنه داعش وسله وال تسليم شول او ژمنه يې وکړه چې نور به له داعش ډلې سره هېڅ ډول اړیکې نه پالي.
د ننګرهار د ملي امنیت رییس ډاکتر بشیر نن (یکشنبه، ۲۱ د لیندۍ) په همدې اړه یو جوړ شوي خبري کنفرانس کې خبریالانو ته وویل، د دغه ولايت په لسو ولسوالیو کې د قومي خلکو په منځګړتوب ۸۰ تنه داعش وسله وال دوی ته تسليم شول.
نوموړی وایي، تسلیم شویو کسانو ته یې د طالبانو د مشر ملا هیبت الله اخندزاده د حکم په اساس چې د عمومي عفوې په تړاو ده، بښنه وشوه.
د ښاغلي بشیر د مالوماتو له مخې تسلیم شویو داعش وسله والو له دې وړاندې د ننګرهار په مختلفو ولسوالیو کې د طالبانو پر ضد فعالیتونه کول.
ډاکتر بشیر زیاته کړه: «د ننګرهار د ملي امنیت ریاست ته د قومي مشرانو په منځګړیتوب او د ملي امنیت په هڅو د دې ولایت په لسو ولسوالیو کې ۸۰ داعشیان مونږ ته تسلیم شول او تسلیم شویو کسانو ته د طالبانو د مشر د حکم پر اساس بښنه شوې، یادو کسانو له دې وړاندې د ننګرهار په ګڼ شمیر ولسوالیو کې د حکومت پر ضد فعالیتونه کول خو اوس دوی په خپلو کړنو پښیمانه دي.»
تسليم شوي داعش وسله وال هم وایي، چې په خپلو تېرو کړنو پښيمانه دي او راتلونکي کې به له داعش ډلې سره هېڅ ډول اړیکې نه ساتي.
د دوی له ډلې غزیز ګل اطلاعات روز ورځپاڼې ته وويل، چې دوی د تېر نظام پر ضد د جګړې په موخه داعش سره يو ځای شوي و او اوس چې طالبان حاکم شول نو دوی هم تسليم شول.
قومي مشران خوښ دي چې په منځګړيتوب يې د دوی د ولسوالیو یو شمېر داعش وسله والو ته طالبانو بښنه وکړه.
په همدې حال کې قومي مشر ملک تورخان وایي، د ننګرهار په یو شمیر نورو ولسوالیو قومي مشرانو پریکړه کړې،که په تسلیم شويو کسانو کې کوم يو له تسلیمۍ وروسته بیا ځلي داعش وسله والو سره یوځای شي، نو د قومي پریکړې له مخې به یې کور سوځول کیږي او له وطن نه به يې جلا وطن کوي.
د ننګرهار د ملي امنیت ریاست د مالوماتو له مخې له کله راهیسې چې دوی واک ته رسیدلي ددې ولایت په بیلابیلو ولسوالیو کې ورته ۴۵۰ تنه داعش وسله وال تسلیم شوي دي.
