اطلاعات روز: د ننګرهار ولایتي چارواکي په دې ولایت کې د ځنګلونو د خپلسري قطع او غصب د مخنیوي په موخه د دوو ځانګړو قطعو د جوړیدو خبر ورکوي.
د ننګرهار رسنیو دفتر نن (چهارشنبه، ۱۰ لیندۍ) په یوه خپره کړې خبرپاڼه کې ویلي، چې د ننګرهار لپاره د طالبانو سرپرست والي حاجي مدثر د کرنې وزارت مرستيال شمس الدين شريعيتي سره د لیدنې پرمهال دې ولایت کې د ځنګلونو قطعې او ځمکو غصب مخنيوي لپاره د ځانګړو قطعو له جوړېدو خبر ورکړی دی.
خبرپاڼې زیاته کړې، چې د وزيرانو شورا د پرېکړې له مخې به ننګرهار کې د ځنګلونو قطع مخنيوي په موخه د« قطعه سبز» په نوم پنځوس کسيزه او د ځمکو غصب مخنيوي په موخه سل کسيزه قطعه فعاليږي چې د ځانګړي طرز العمل له مخې به د ځنګلونو ساتنه کوي.
د خبرپاڼې له مخې چې د شنو ونو قطع، د تازه او پوستکيو لرونکو لرګيو قاچاق، پير او پلور منع دی، خو د قطع شویو وچو لرګيو د ملکيت تثبیت به کيږي او د يوې مياشتې په موده کې به يې مالکين د ځنګل او شاوخوا سيمو څخه انتقالوي.
طالب چارواکي داسې مهال ننګرهار کې د ځنګلونو د خپل سري وهلو په موخه د ځانګړو قطعو د جوړیدو خبر ورکوي، چې له دې وړاندې د دې ولایت په یو شمیر سیمو کې ځنګلونه په خپلسري ډول وهل شوي او لرګي یې پاکستان او نورو هیوادونو ته قاچاق شوي دي.
