اطلاعات روز: د ننګرهار ۲۲ ولسواليو ته نوي ولسوالان او امنيه قوماندانان او دغه راز د ځینو ادارو مشران معرفي او خپلې دندې یې پیل کړې.
د ننګرهار والي مولوي محمد داود مزمل د يوې غونډې په ترڅ کې د ۲۲ ولسواليو لپاره نوي ولسوالان، امنيه قوماندان، جلال اباد ښاروال، د پاسپورت رییس، د شاهراه قوماندان او د شينوارو ښاروال مسولینو ته ور وپېژندل او رسماً يې دندې پیل کړې.
په دې غونډه کې چې امنیه قوماندان شيخ الحديث مولوي نداء محمد نديم، د استخباراتو رئيس ډاکتر بشير، د امنیت امر مولوي مبارز او نورو مسولينو ګډون کړی و، د ننګرهار والي ټولو مسولینو ته د طالبانو د رهبر د حکم سره سم د شريعت له مخې د چارو پرمخ وړلو سپارښتنې وکړې.
نوموړي وویل، چې تغير او تبديل د ادارې اصل دی او طالبانو کې مسوليت غوښتل کيږي نه، بلکې ورکول کيږي او مسولینو ته يې لارښوونه وکړه چې له الله ج څخه ويره وکړي او خپل مسولیت په نيک چلند سره تر سره کړي.
هغه د خلکو له وهلو او تعذیر، له محکمې پرته د جزا ټاکلو او د شپې له لوري د عملیاتو مخنيوي لارښوونې وکړې.
د ننګرهار والي همدا راز د طالبانو مجاهدينو ته سپارښتنه وکړه، چې په چيک پواينټونو کې خلک ونه ځوروي، د علماء کرامو قدر وکړي او که کوم مسول ظلم وکړي، نو د شريعت له مخې به ور سره چلند وکړي.
د ننګرهار امنيه قوماندان شيخ الحديث مولوي نداء محمد نديم مسولینو ته د خپلمنځي همغږۍ، همکارۍ، د اړيکو پراختيا، له وسايلو او وسايطو څخه د ښې ګټې اخيستنې، د خپلې لايحې له مخې د چارو پرمخ وړلو او يو لړ نورو برخو کې نظامي او مسلکي سپارښتنې وکړې.
د غونډې په پای کې د ولايت مقام دفتر رییس مولوي اميرالحق طيب احمد له لوري د ښار او ولسواليو مسولين د يو مکتوب له مخې مسولينو ته ور وپېژندل شول او په چارو کې ورته د بريا هيله وشوه.
