اطلاعات روز: د پکتیا په ډنډ پټان ولسوالۍ کې هغه ځوان چې پر سبا یې د واده مراسم ول، د ځمکې پر سر شخړې له امله وژل شوی دی.
تېره ورځ مازديګر (دوشنبه، ۱۷ د لړم) مهال د پکتیا ولایت د ډنډ پټان ولسوالۍ اړوند «ستيا» کلي کې د ځمکې په سر د دوو کورنيو ترمنځ شخړه کې هغه ځوان وژل شوی چې سبا ورځ يې د واده مراسم ترسره کېدل او په خپلې خوښۍ کې يې د ګډون لپاره خپلوانو او نږدې ملګرو ته د بلنې کارتونه هم ورلېږلي و.
د ستيا کلي اوسېدونکي محمد الدين ستياوال اطلاعات روز ته وويل، چې پېښه مازديګر مهال د حاجي ګل او جنت خان د کورنيو ترمنځ په يوه ټوټه ځمکه شخړه شوې، چې په کې د جنت خان زوی «محمد الرحمان» وژل شوی دی.
په همدې حال کې بيا د پکتيا د اطلاعاتو او کلتور رییس خالقيار احمدزی وايي، شخړه کې يو کس وژل شوی او بل ټپي دی، هغه زياتوي، چې امنیتي کسانو د شخړې له ښکېلو غاړو ۸ کسان هم نيولي دي.
پکتيا د هيواد له هغو ولايتونو ګڼل کيږي، چې ډیری وخت د ځمکې په سر رامنځته کېدونکې ستونزې په شخړو او مرګ ژوبلې تمامې شوې دي.
