اطلاعات روز: د افغانستان کرکټ بورډ عمومي مشر عزیزالله فضلي د کرکټ نړیوالې شورا له مشر ګریګ بارکلې سره لیدنه کې نوموړي ته ډاډ ورکړی چې د طالبانو نوی حکومت به د دې هېواد کرکټ بورډ اداره کې هېڅ ډول لاسوهنه نه کوي.
د افغانستان کرکټ بورډ وایي، دغه لیدنه چې پرون (یکشنبه، ۱۶ د لړم) په متحده عربي اماراتو کې شوې چې د دې بورډ مشر عزیزالله فضلي د کرکټ نړیوالې شورا مشر ته هېواد کې د کرکټ روان وضعیت په اړه بشپړ مالومات ورکړي دي.
کرکټ بورډ لیکلي: «ښاغلي فضلي همدارنګه ښاغلي بارکلې ته ډاډ ورکړ چې د افغانستان اوسنی حکومت د افغانستان کرکټ بورډ پوره ملاتړ کوي او د یادې ادارې په چارو کې به هیڅ ډول لاسوهنه نه کیږي.»
د کرکټ بورډ په وینا چې ښاغلي بارکلې د افغانستان د کرکټ بورډ د کړنو او فعالیتونو ستاینه کړې او ډاډ یې ورکړی چې د کرکټ نړیواله شورا به د افغانستان د کرکټ بورډ پوره ملاتړ کوي.
کرکټ بورډ ویلي: «د دغې ناستې په پایله کې د کرکټ نړیوالې شورا مشر ګریګ بارکلې د افغانستان کرکټ بورډ د مشر ښاغلي عزیز الله فضلي هلې ځلې ستایلې دي او هم یې د افغانستان کرکټ بورډ د کړنو او فعالیتونو ستاینه کړې ده. نوموړي همدارنګه د خپلو خبرو په دوام کې ویلي چې د کرکټ نړیواله شورا د افغانستان کرکټ بورډ پوره ملاتړ کوي.»
د بورډ په وینا، ښاغلی فضلي به د روانې نومبر میاشتې په ۱۳مه او ۱۶مه نېټه د کرکټ نړیوالې شورا د بورډ له غړو او یو شمېر کمېټو سره هم د افغانستان د کرکټ په تړاو ناستې ولري.
دغه راز د کرکټ بورډ مشر عزیزالله فضلي د نيوزیلیند د کرکټ بورډ له اجراییوي رییس ډیویډ وایټ سره هم لیدلي دي. ښاغلي فضلي له ښاغلي وایټ سره د لیدنې په ترڅ کې د دواړو لوبډلو ترمنځ د دوه اړخیزو سیالیو په اړه خبرې کړې دي چې دواړو لوریو په نږدې راتلونکي کې د دواړو هیوادونو ترمنځ د سیالیو د یوې لوبلړۍ د ترسره کېدو ژمنه هم کړې ده.
