اطلاعات روز: ارزګان ولایت کې د «سلام» مخابراتې شبکې له خوا په لومړی ځل د ۳جي چوپړونه فعال شول.
د ارزګان ولايت د مخابراتو رياست د اترا مسوول احمد جاويد خپلواک اطلاعات روز ته وويل، له نن ورځې (چهارشنبه، ۲۱ د تلې) څخه به په ارزګان کې د سلام مخابراتې خدمتونه فعال شي او خلک به ورڅخه استفاده وکولی شي.
هغه وايي د اوس لپاره يې د سلام مخابراتې شبکې د (۰۱) انتن کې د سټلايټ له لارې دغه خدمتونه فعال کړي دي چې په ټيټ سرعت سره به کار کوي.
هغه وايي ياد خدمتونه يې د خلکو اړتياوو ته په کتو فعال کړي دي او هڅه به وکړي چې په راتلونکې کې په دوو نورو انتنونو کې هم دغه خدمتونه فعال کړي.
نوموړې په ارزګان کې دغه خدمتونه په لومړي ځل وبلل او زياته يې کړه چې د ۳جې د خدمتونو فعاله کيدل په ارزګان ولايت کې د خوښۍ خبر دی.
هغه وايي نورو خصوصي مخابراتي شبکو هم ژمنې کړي دي چې ارزګان کې ياد خدمتونه فعالوي.
احمدجاويد خپلواک وويل: «موږ له نن ورځې څخه په ارزګان کې د سلام مخابراتي شبکي د ۳جي خدمتونه فعال کړل. دا د ارزګان د خلکو لپاره د خوښۍ خبر دی د اوس لپاره موږ په ۰۱ انتن کې د سټلايټ له لارې دغه خدمتونه فعال کړي دي، په راتلونکي کې به يې په نورو انتنونو کې هم فعال کړو، نورو مخابراتي شبکو هم ژمنې کړي دي چې دلته به ياد خدمتونه فعال کوي د اوس لپاره به په ارزګان کې د۳جي خدمتونو سرعت کمزورۍ وي.»
په ورته مهال د دغه ولايت خلکو د يادو خدمتونو له فعاله کيدو څخه خوښ ښکاري او هيله لرې چې نورې مخابراتې شبکې هم ياد خدمتونه فعال کړي.
خلک وايي په اوسنيو وختونو کې انټرنیټي خدمتونو ته خلک زيات اړتيا لري او مسوولينو ته په کار ده چې د ۳جې خدمتونو لپاره لا زياتي هڅي وکړي او ياد خدمتونه ۴جې کړي.
په اړه یې د ارزګان ولايت اوسيدونکی وحيدالله واحيدي وايي: «موږ زيات خوښ يو چې په لومړي ځل د ۳جې د خدمتونو څخه برخمن کيږو په اوسنيو وختونو کې انټرنيټ د لاس رسۍ يو ضرورې اړتيا ده له مسولينو غوښتنه کوو چې په نورو مخابراتي شبکو کې هم دغه خدمتونه فعال کړي، نن دارزګان ټول خلک د دغو خدمتونو په فعاله کيدو سره خوښ دي.»
تردې مخکي هم د دغه ولايت اوسيدونکو په څو څو ځله له حکومت څخه د يادو خدمتونو د فعاله کيدو غوښتنه کړې وه.
