اطلاعات روز: زابل ولایت کې روغتیایي مسوولین وایي، په يوه مياشت کې ۲۴۰ کسان په ترافيکي پيښو کې ژوبل شوي دي.
زابل ولايت چې د هېواد په جنوب کې پروت ولايت دي روغتيايي مسولين يې د ترافيکي پيښو زياتيدو ته سخته انديښمن دي او په خبره يې چې په تيره يوه مياشت کې لسګونه کسانو ته په ترافيکي پيښو کې مرکژوبله اوښتي ده.
د زابل ولايت د ولايتي روغتون سرپرست محمد داود مجددي وايي د مرکز قلات او شاوخوا سيمو څخه ۲۴۰ کسان ولايتي روغتون ته ور وړل شوي چې يو شمير کسانو يې ژوند هم له لاس ورکړی دی.
نوموړی زياتوي چې د تير په پرتله د ترافيکي پيښو دغه ډول ګراف زيات لوړ دی او په خبره يې که کنټرول نه شي د يوه کال په جريان کې به دغه شمیره ۱۵۰۰ سوه کسانو ته ورسيږي.
هغه وايي په روغتون کې شته امکانات د پخوا په پرتله کم دي او انديښمن دی که د ترافيکي پيښو کچه دغه ډول لوړه روانه وي درملنه به يې سخته شي.
هغه وويل: «په يوه مياشت کې د زابل ولايتي روغتون ته ۲۴۰ کسان د ترافيکي پيښو قربانيان راوړل شوي دي چې يو شمير کسانو يې ژوند د لاسه هم ورکړی دی. دغه شمير د تيرو وختونو په پرتله ډېره لوړه ده او موږ په دي برخه کې سخته انديښمن يو که دغه ډول حالت دوام پیداکړي په يوه کال کې به د ترافيکي پيښو شمير ۱۵۰۰ کسانو ته ورسيږي په داسي حال کې چې د ولايتي روغتون امکانات هم مخ پر کميدو دي.»
د مرکز قلات ښار اوسيدونکي وايي د وسايطو د چلوونکو د بي احتياطۍ له امله هره ورځ په ښار کې ترافيکي پيښي رامنځته کيږي.
د دغه ولايت دوه اوسيدونکو حميدالله او عبدالقوي اطلاعات روز ته وويل چې ډيرو کورنيو نقله وسايط ماشومانو ته په لاس ورکړي وي چې د هغويي د بي احتياطۍ له امله دغه ډول پيښي رامنځته کيږي.
دوی د زابل ولايت د ترافيکو رياست د مسولينو څخه غوښتنه کوي چې د ترافيکي پيښو د ګراف کښته کولو په هدف دې هغه کسان مجازات کړي چې ناقانونه لېږدوونکي وسايط چلوي.
دوی وايي د غيرقانوني چلوونکو له امله په ښار کې په ډاډه زړه تګ راتګ نه شي کولای او د ترافيکي پيښو د رامنځته کيدو څخه ويره لري.
حميدالله وويل: «په زابل کې د ترافيکي پيښو شمير خورا لوړ دی موږ ډير خلک ليدلي چې ماشومانو ته يې موټر او ياهم موټرسایکل د چلولو لپاره په لاس ورکړی وي، هغوی په ترافيکي قوانينو هم نه پوهيږي موږ د ترافيکي مسولينو څخه غواړو چې د دغې ستونزې د حل لپاره دې لاس په کار شي او په دې برخه کې دې جدي هڅي وکړي.»
د خلکو دغه اندېښنې او غوښتنې مو د زابل ولايت د ترافيکو مديريت له مسولينو سره شریکې کړې.
د دغه ولايت د ترافیکو مشر عبدالولي هم مني چې په ښار کې د ترافيکي پيښو ګراف لوړ شوی دی، خو زياتوي چې دوی يې د مخنېوي لپاره هڅې پیل کړي دي.
هغه يې لامل ښار ته د ليريو پرستو سيمو څخه د خلکو راتلل او ماشومانو ته نقیله وسايط په لاس ورکول يادوي.
نوموړي د ترافيکي پيښو په مخنيوي کې د هر افغان مسولیت مهم ياد کړ او د نقلیه وسايطو پر چلوونکو يې غږ وکړ چې له احتياطه کار واخلي.
عبدالولي وويل: «رشتيا هم د ترافيکي پيښو شمير خورا لوړ شوی دی، دوه ستر لاملونه لري لومړی داچي ډيرو کورنيو ماشومانو ته چې هغوی په ترافيکي اصولو هم نه پوهيږي نقلیه وسايط يې د چلولو لپاره ورکړي وي دوهم لامل يې د ليري اطرافو سيمو څخه خلک ښار ته را داخل شوي دي، هغوی هم په ښار کې د موټر چلونو له اصولو سره نابلده دي، دغه د هر افغان وجداني دنده ده چې ماشومانو ته نقله وسايط د چلونو لپاره په واک کې ور نه کړي موږ هم ډيرې هڅې پیل کړي ترڅو د هغو کسانو سره قانوني چلند وکړو چې له اصولو سرغړونه کوي.»
په هېواد کې د موټرو چلونکو د بي احتياطۍ له امله هر کال ګڼ شمېر کسان خپل ژوند د لاسه ورکوي.
