اطلاعات روز: پر افغانستان د امریکایي یرغل شل کاله پوره شول. له نن شل کاله وړاندې په همدې ورځ یانې د تلې په ۱۵مه او د اکټوبر په ۷مه امریکا پر افغانستان یرغل وکړ او د طالبانو حکومت یې راوپرځاوه.
د امریکا متحده ایالات د قطر دوحه کې طالبانو سره د سولې د تړون له مخې، اوس له افغانستانه بشپړ وتلي او طالبان پر افغانستان واکمن شوي دي.
طالبانو نن (پنجشنبه، ۱۵ د تلې) په یوې خپرهکړې اعلامیه کې ویلي، چې امریکا په دې یرغل سره په تېرو شلو کلونو کې امریکایي ولس ته له ځاني تلفاتو او بېشمېره مالي لګښتونو پرته بل څه نه لرل.
د طالبانو اعلامیه دغهراز وایي، چې د دې یرغل پایله کې «زرګونه» افغانان ووژل شول، معیوب او بېکوره شول.
د طالبانو اعلامیه وایي: «له نن څخه پوره شل کاله مخکې په همدې ورځ امریکا زموږ په ګران هیواد افغانستان باندې پوځي یرغل وکړ او اسلامي امارت د ملکي هیوادوالو د تلفاتو او په ښارونو کې د تخریب د مخنیوي هدف د لنډ مهال له پاره ظاهرا له ښارونو څخه خپل ځواکونه وایستل.»
طالبانو په دې اعلامیه کې دوی سره د امریکا د سولې تړون ته په اشارې نورو هېوادونو ته خبرداری ورکړی چې د دوی په وینا که پر افغانستان یرغل وکړي، بدو پایلو سره به مخ شي.
اعلامیه کې راغلي: «دا چې شل کاله وروسته امریکا په دوحه کې د یوه توافق له مخې زموږ له هیواد څخه خپل ځواکونه وایستل، دا ښه ګام و؛ ولې دا باید نورو ته هم واضح پیغام وي، چې زموږ په هیواد باندې هجوم راوړل، څومره بدې پایلې لري او هیڅکله یې هم په اړه باید فکر ونکړي.»
په همدې اعلامیې کې بیا طالبانو پر نړیوالو هېوادونو او سازمونونو غږ کړی چې د افغانانو لاسنیوی وکړي.
اعلامیه په دې برخه کې زیاتوي چې نړیوال هېوادونه او سازمانونه دې خپلې مرستې د سیاسي فشارونو وسیله ونه ګرځوي او د شته ستونزو د له منځه وړلو په برخه کې دې د صادقانه همکارۍ په روحیه د مسایلو حل ته راوړاندې شي، تر څو د دوی په وینا، په تېرو شلو کلونو د بهرنیانو د شتون پایله کې رامنځته شوې ستونزې له منځه لاړې شي او افغانان پریښودل شي د خپل هیواد د راتلونکي په اړه خپله تصمیم ونیسي.
