اطلاعات روز: پکتیا کې د یونسیف په مالي لګښت سلګونه کورنیو ته د پاکو اوبو رسولو پروژه پیل شوه.
د اوبو رسولو ياده شبکه چې د پکتیا ولايت په مرکز ګردېز کې یې نن (یکشنبه، ۲۸ د وږي) عملاً چارې پیل شوې، سلګونه کورنیو ته به د څښاک پاکې اوبه ورسوي.
په دې ولايت کې د طالبانو ولايتي مسوولين وايي په همدې پروژه څه باندې پنځه میلیونه افغانۍ لګښت راځي چې د جوړېدو چارې به یې په څلورو میاشتو کاري موده کې بشپړې شي.
د سیمې خلک د یونسیف موسسې له دې اقدامه خوښي څرګندوي او وايي، چې د دې پروژې په تکمېلېدو سره به یې د پاکو اوبو برخه کې ګڼې ستونزې هوارې شي.
نور ګل چې له کلونو راهيسې په ياده سيمه کې د پاکو اوبو له نه شتون سر ټکاوه، وويل چې دوی به د دې پروژې په فعالېدو سره وکولی شي، چې په ښه او اسانه ډول له پاکو اوبو برخمن شي.
پکتيا کې د طالبانو ولايتي چارواکي وایي، دوی به د دې او ورته نورو پروژو په سمه توګه نظارت او څارنه کوي او په وينا يې چې نور موسسات به هم وهڅوي تر څو په دې ولایت کې خلکو ته په بېلابېلو برخو کې خدمات ترسره کړي.
د نظام له بدلون وروسته دا په پکتيا کې لومړنۍ رغنيزه پروژه ده، چې د جوړېدو چارې يې پيليږي.
