اطلاعات روز: د طالبانو د بهرنیو چارو مرستیال وزیر شېرمحمد عباس ستانکزي د ملګرو ملتونو د عمومي منشي ځانګړې استازې ډیبورا لاینز سره لیدنه کې، دواړو لوریو افغانستان سره د پخوا په څېر د بشري مرستو پر دوام ټینګار کړی دی.
قطر کې د طالبانو د سیاسي دفتر ویاند ډاکټر محمد نعیم په یو لړ ټوېټونو کې ویلي چې دغه لیدنه پرون (سهشنبه، ۲۳ د وږي) په دوحه کې شوې ده.
د ښاغلي نعیم په وینا، په دې لیدنه کې د افغانستان په روان وضعیت، ، له افغانستان سره د جینېوا په وروستي کانفرانس کې د ترسره شویو مرستو، په افغانستان کې د ملل متحد د کارکوونکو په امنیت او د هیواد په اقتصادي وضعیت خبرې وشوې.
جینېوا کنفرانس چې د ملګرو ملتونو په نوښت افغانستان سره د بشري مرستو په موخه راغوښتل شوی و، په کې دې هېواد سره له یو میلیارد ډېرو ډالرو مرستو اعلان وشو. له دغو مرستو طالب چارواکو مننه وکړه.
ښاغلي نعیم د یادې لیدنې په اړه دغهراز لیکلي چې ډیبورا له وروستيو تحولاتو وروسته په افغانستان کې د ملګرو ملتونو د کارمنانو د خوندیتوب په برخه کې د طالبانو له لوري د ترسره شویو ګامونو له امله مننه وکړه.
نوموړی وایي چې د طالب لوري هم د دوی کارکوونکو لا خوندیتوب لپاره ورته ډاډ ورکړل شو.
ډاکټر محمد نعیم زیاتوي:«دواړو لوریو په دې ټینګار وکړ چې بشري مرستې بايد د پخوا په څیر دوام پیدا کړي.»
له بلې خوا قطر کې د طالبانو د سیاسي دفتر ویاند محمد نعیم پر خپل ټوېټر لیکلي چې همدا پرون د طالبانو د بهرنیو چارو مرستیال وزیر شېرمحمد عباس ستانکزي او مل پلاوي، افغانستان لپاره د ناروې د ځانګړي استازي پرالبرټ الساس او د افغانستان لپاره د ناروې سفیر او مل پلاوي سره په دوحه کې وکتل.
د ښاغلي نعیم په وینا، په دې لیدنه کې د افغانستان پر روان وضعیت، بشري مرستو او یو لړ سیاسي موضوعاتو خبرې وشوې.
نوموړی زیاتوي چې ښاغلي ستانکزي د ناروې د بشري مرستو له امله مننه وکړه او زیاته یې کړه چې په افغانستان کې ټولو بشري موسساتو لپاره د امنیت چاپیریال رامنځته شوی او دوی په ډاډمنه فضا کې خپل فعالیتونه ترسره کولی شي.
