اطلاعات روز: د طالبانو ویاند او د اطلاعاتو او کلتور مرستیال ذبیحالله مجاهد وایي، د امریکا له لوري په تور لېست کې د دوی د کابینې ځینې غړي او د حقاني کورنۍ نومونو یادول، د دوحې له تړونه سرغړونه ده.
د طالبانو ویاند ذبیحالله مجاهد نن (پنجشنبه، ۱۸ د وږي) پر خپل ټوېټر د یوې اعلامیې په خپرولو سره ویلي، چې د امریکا له خوا د دوی په تورو لېستونو کې د طالبانو کابینې ځینو غړو او حقاني کورنۍ نومونو یادول د دوحې له تړونه سرغړونه ده او زیاتوي چې دا دریځ نه د امریکا او نه هم د افغانستان په ګټه ده.
اعلامیه کې راغلي: «د امریکا د دفاع وزارت چارواکو ویلي چې ګواکې د اسلامي امارت په کابینه کي ځیني مشران یا د حقاني صاحب رحمه الله کورنۍ د امریکا په تورو لیستونو کې دي او داچي د دوی هدف دي. اسلامي امارت دغه دريځ د دوحې د تړون څخه ښکاره سرغړونه بولي.»
اعلامیه کې راغلي چې د حقاني کورنۍ د «اسلامي امارت» برخه ده او هیڅ کوم جلا نوم او تشکیلات نه لري.
د طالبانو اعلامیه کاږي: «همدارنګه د دوحې په تړون کې بې له کومې استثنا څخه د اسلامي امارت ټول مسئولین له امریکا سره د تعامل برخه وو او باید د ملګرو ملتونو او د امریکا د تورو لیستونو څخه ایستل شوی وای چې اوس هم دا غوښتنه پخپل ځای ده.»
د ذبیحالله مجاهد له لوري په خپره شوې اعلامیه کې راغلي دا چې امریکا یا نور هېوادونه د افغانستان په داخلي چارو کې «پاروونکي» نظرونه څرګندوي او د لاسوهنو هڅه کوي، دوی دا دريځ په کلکو ټکو ردوي.
دوی زیاتوي د امریکایې چارواکو دا ډول څرګندوني د تیرو «ناکامو» تجربو تکرار او د امریکا په زیان دریځ دی. طالبان په دې اعلامیه کې غوښتنه کوي چې هرڅه ژر دغه ډول ناسم دريځ په دیپلوماتیکه راشه درشه بدل شي.
د امریکا فدرال څېړنو ادارې (اف بي آی) ویلي چې د حقاني شبکې مشر سراجالدین حقاني د امریکا تور لېست کې دی او امریکا یې د نیولو لپاره لس مېلیونه جایزه ټاکلې ده. سراجالدین حقاني د طالبانو نوې کابینه کې د کورنیو چار وزارت چارسمبالی وزیر ټاکل شوی دی.
