اطلاعات روز: پلازمېنه کابل کې یو شمېر دیني عالمانو یوې غونډه کې له طالبانو او په پنجشېر کې د «طالبانو ضد مقاومت جبهې» له قوماندان احمد مسعود وغوښتل چې جګړه ودروي او د خبرو له لارې یو حل ته ورسېږي.
دغه غونډه چې نن (یکشنبه، ۱۴ د وږي) ترسره شوه، په کې یو دیني عالم عبدالقادر قانت وویل چې د پنجشېر ولایت موضوع د جنګ له لارې نه شي حلېدی.
ښاغلي قانت د طالبانو پر رهبرۍ او پنجشېر کې د مقاومت جبهې پر قوماندان احمد مسعود غږ وکړ، چې له جګړې لاس واخلي او موضوع د خبرو له لارې حل کړي.
دا په داسې حال کې ده چې پنجشېر کې د طالبانو او د احمدشاه مسعود د زوی احمد مسعود په قوماندې سختې جګړې شوي او لا هم دغه جګړه روانه ده.
تازه د مقاومت دې جبهې یو ویاند فهیم دشتي ادعا کړې چې د دې ولایت پریان ولسوالۍ یې د طالبانو له شتونه پاکه کړې ده. هغه پر خپل ټوېټر لیکلي چې لږ تر لږه زر تنه طالبان چې د دې ولسوالۍ پر لاره ګیر پاتې ول، ټول یې د تېښتې او شا تګ پر مهال د ځایي خلکو په مرسته او د مقاومتي وسلهوالو په مټ وژلي، تسلیم شوي او یا هم دوی نیولي دي.
ښاغلي دشتي دغه راز ادعا کړې چې نیول شوي ډېری یې بهرني او په هغو کې بیا ډېر یې پاکستاني دي.
خو طالبان بیا دا ادعاوې ردوي. د طالبانو د ویاند او اطلاعات او کلتور وزیر ذبیحالله مجاهد سکرتر بلال کریمي اطلاعات روز ورځپاڼې ته وویل، چې دوی د پنجشېر د مرکز بازارک او رخه ولسوالۍ پرته نورې ټولې سیمې په خپلې ولکه کې راوستي دي.
ښاغلي کريمي وویل چې په دې ولایت کې د دوی جګړه او چاڼیز عملیات جریان لري.
دیني عالم عبدالقادر قانت دغهراز په خپلې وینا کې له طالبانو وغوښتل چې د خلکو درد ته دې ورسېږي او خپل حکومت دې ژر اعلان کړي. ښاغلي قانت وویل، طالبان دې خپل حکومت چې په وینا یې اسلامي ټولشموله او له هر ډول تعصبه پاک وي، اعلان کړي. هغه وویل چې خلک اوسمهال سخت کړاو کې دي او باید طالبان یې درد ته ورسېږي.
د طالبانو مرستیال او قطر کې د دې ډلې سیاسي دفتر مشر ملا عبدالغني برادر بیا ویلي چې د یو ټولشموله حکومت په جوړېدو کار روان دی.
