د امریکا دفاع وزارت (پنټاګون) ویلي دي، چې د دې هېواد ولسمشر ډونالډ ټرمپ له افغانستانه د شاوخوا دوه زرو امریکایي ځواکونو د وتلو امر ورکړی دی.
د امریکا دفاع چارسمبالی وزیر کرستوفر میلر تېره ورځ (سه شنبه، ۲۷ لړم) پنټاګون کې یوې ناستې ته ویلي، چې د راتلونکي (۲۰۲۱) زیږدیز کال د جنوري تر ۱۵مې افغانستان کې د امریکایي ځواکونو شمېر دوه زره او ۵۰۰ تنو ته را کم کړي.
له بلې خوا، ښاغلي میلر زیاته کړې چې د ډونالډ ټرمپ په امر له عراق څخه هم د ځواکونو ایستنه پیلوي او د راتونکي کال د جنورۍ تر ۱۵مې د ځواکونو شمېر تر دوه زره او ۵۰۰ تنو کموي.
اوسمهال افغانستان کې د امریکایي ځواکونو شمېر څلور زره او ۵۰۰ او عراق کې بیا درې زره تنو ته رسیږي.
په ورته مهال، د امریکا دفاع سرپرست وزیر ویلي دي، چې د دې ځواکونو وتل به داسې وشي، څو په دې دوو هېوادونو کې له امریکایي اوسېدونکو ساتنه وشي.
له بلې خوا هغه ټینګار کړی دی، چې په دې اړه یې له ولسمشر محمد اشرف غني او د ناټو له لوی منشي ینس سټولټنبرګ سره خبرې کړې دي.
خو د ناټو سرمنشي پنټاګون ته له افغانستانه د امریکایي ځواکونو وتلو په اړه په ځواب کې ویلي، چې په دې هېواد کې به دا برنامه په لوړه بیه وي.
ولسمشرۍ ماڼۍ هم په یوې خبرپاڼه کې ویلي، چې ښاغلي غني د امریکا له سرپرست دفاع وزیر سره خبرو کې د دواړو هېوادونو اړیکو او د سولې پروسې په تړاو ټیلیفوني خبرې کړي دي.
په خبرپاڼه کې ټینګار شوی، چې د امریکا دفاع وزیر په دې خبرو کې له افغانستان څخه د امریکا نظامي ځواکونو پر تلپاتي ملاتړ ټینګار کړی دی.
