اطلاعات روز: ملي دفاع وزارت وایي، افغان دفاعي او امنیتي ځواکونو سره نښتو کې د طالبانو ډلې ۲۳۴ غړي وژل شوي او ۱۰۳ نور ټپيان شوي دي.
ملي دفاع وزارت نن (سه شنبه، ۱ د چنګاښ) د یوې خبرپاڼې په خپرولو سره ویلي چې دغه شمېر طالبان یې د تېرو ۲۴ ساعتونو په موده کې وژلي او ټپي کړي دي.
د یاد وزارت خبرپاڼه وایي، دغه طالبان د هېواد لوګر، ننګرهار، پکتیکا، خوست، کندهار، زابل، فاریاب، بلخ، سمنګان، هلمند، تخار، بغلان، پروان، کندز او کابل ولایتونو کې وژل شوي او ټپيان شوي دي.
خبرپاڼه دغه راز وایي، په دې نښتو کې د طالبانو یو شمېر وسلې او مهمات هم له منځه وړل شوي دي.
د دفاع وزارت خبرپاڼه زیاتوي: «د دې په خواکې ۵۷ بېلابېل ډول ماینونه چې طالبانو د هېواد په مختلفو سیمو کې د ملکي خلکو، دفاعي او امنیتي ځواکونو د تګ راتګ په لارو کې ځای پرځای کړي وو، د ملي اردو ځواکونو له لوري کشف او خنثی شول.»
اخوا بیا طالبانو ډلې ادعا کړې چې تېرو ۲۴ ساعتونو کې یې د هېواد بېلابېلو ولایتونو لس ولسوالۍ نیولې دي. د طالبانو ویاندویان وایي، د غویي له ۱۵مې تر اوسه یې شاوخوا ۶۰ ولسوالۍ نیولي او د دوی په ولکه کې دي.
ملي دفاع وزارت بیا نن وویلې، چې درې ولسوالۍ یې بېرته له طالبانو نیولي دي. په نیول شویو ولسوالیو کې یوه د بلخ ولایت بلخ، د بغلان دوشي او د کندوز علي اباد ولسوالۍ دي.
خو طالبانو ویاند ذبیح الله مجاهد بیا پر خپل ټوېټر لیکلي، چې دغه ولسوالۍ ترې نه دي نیول شوي او لا هم د دوی په ولکه کې دي.
په وروستیو اونیو کې د هېواد ګوټ، ګوټ کې د طالبانو او دولتي ځواکونو ترمنځ وخت ناوخت نښتې کیږي او د تاوتریخوالي کچه مخ په ډېرېدو ده. د طالبانو له خوا نیول شوې ولسوالیو کې ځينې یې داسې هم دي چې د ولایتي شوراګانو د ځینو غړو په وینا، له کومې نښتې پرته، یا هم ځواکونو ته د اکمالاتو نه رسېدو له امله طالبانو ته پرېښودل کېږي.
د طالبانو او دولتي ځواکونو ترمنځ په دې جنګ جګړو کې ملکي وګړي ډېر قرباني دي. هغه ولایتونو کې چې جګړې په کې روانې دي، له هرې سیمې ان په سلګونه کورنۍ بې ځایه او له نامالوم برخلیک سره مخ دي.
